Еўрадэпутаты заклікалі Мінск спыніць рэпрэсіі і вызваліць палітвязняў
31 студзеня, Позірк. “Неадкладна спыніць усе рэпрэсіі, пераследы і адвольныя затрыманні”, вызваліць усіх палітычных зняволеных і членаў іх сем’яў, а таксама выконваць свае міжнародныя абавязацельствы заклікалі Мінск 31 студзеня ў Бруселі кіраўнік дэлегацыі па сувязях з Беларуссю, дэпутат Еўрапейскага парламента (ЕП) Юозас Алекас і пастаянны дакладчык ЕП па Беларусі, дэпутат Пятрас Аўштравічус.
У заяве зазначаецца, што еўрадэпутаты “ўзрушаны <…> пераследам паводле гендэрнай прыкметы” і заклікаюць да “неадкладнага і безумоўнага вызвалення арыштаваных жанчын і іншых членаў сем’яў палітычных зняволеных”.
“Нядаўнія рэйды і ператрусы ў дамах палітычных зняволеных, праведзеныя апаратам бяспекі рэжыму, прывялі да арышту больш за 200 чалавек <…>. Большасць арыштаваных — жанчыны, жонкі і маці палітвязняў, у тым ліку Марына Адамовіч, жонка палітвязня, <…> Мікалая Статкевіча”, — адзначаюць палітыкі.
Дэпутаты заклікалі сустрэць “гэтыя злачынныя дзеянні рэжыму”, а таксама справу так званых “аналітыкаў Ціханоўскай”, якім прад’яўлена завочнае абвінавачанне, “дадатковым адказам з боку ЕС <…> у выглядзе ўзмацнення ціску на рэжым у выглядзе санкцый”.
13 студзеня ў Вільнюсе дэмакратычны лідар Святлана Ціханоўская на сустрэчы са старшынёй Еўрапарламента Робертай Метсала абмеркавала шляхі па вызваленні беларускіх палітычных зняволеных.
Дэмлідар перадала кіраўніку ЕП прапанову “прыняць асобны санкцыйны пакет супраць асоб, якія маюць дачыненне да рэпрэсій, а таксама супраць прадпрыемстваў, якія выкарыстоўваюць прымусовую працу зняволеных”. Адзначаецца, што “многія з гэтых прадпрыемстваў прадаюць сваю прадукцыю ў краіны Еўрасаюза”.
