Латушка заклікаў Еўрапарламент увесці санкцыі супраць Мінска “за рабскую працу палітвязняў”

5 лютага, Позірк. Народнае антыкрызіснае ўпраўленне (НАУ) праз еўрапейскіх дэпутатаў перадало прапановы для праекта новай рэзалюцыі Еўрапейскага парламента ў сувязі з пагаршэннем сітуацыі ў Беларусі, паведаміў кіраўнік НАУ, намеснік кіраўніцы Аб’яднанага пераходнага кабінета (АПК) Павел Латушка.

Паводле слоў палітыка, неўзабаве Еўрапарламент прыме рэзалюцыю праз “цемрашальства, якое не спыняецца ні на адзін дзень, і затрыманні сотняў беларусаў за апошні час”.

Кіраўнік НАУ заклікаў “прыняць найхуткія санкцыі” ў дачыненні да тавараў, “якія вырабляюцца з дапамогай прымусовай рабскай працы палітвязняў”, каб дамагчыся ад рэжыму Аляксандра Лукашэнкі вызвалення вязняў.

Латушка бачыць неабходнасць у “хутчэйшай гарманізацыі гандлёвых санкцый паміж рэжымам Лукашэнкі і Расіяй”. На яго думку, таксама трэба абмежаваць “транзіт падсанкцыйных тавараў праз тэрыторыю Беларусі і Расіі ў/з трэціх краін”, у тым ліку “з дапамогай спецыяльных квот”, каб ліквідаваць магчымасці абыходу існых абмежаванняў.

Неабходна “пастрожыць фінансавыя санкцыі” супраць рэжыму Лукашэнкі — “аж да закрыцця, блакавання карэспандэнцкіх рахункаў беларускіх банкаў, якія абслугоўваюць падсанкцыйныя кампаніі з Расіі і Беларусі”, заявіў дыпламат.

Таксама ён заклікаў увесці санкцыі ў дачыненні да “сістэмы перадачы фінансавых паведамленняў Банка РФ” (расійскага аналага сістэмы SWIFT), з дапамогай якога “расійскія ўлады і кампаніі хаваюць факты абыходу абмежавальных мер”.

Паводле слоў Латушкі, раней НАУ перадаў гэтыя прапановы міністрам замежных спраў Польшчы, Літвы, Эстоніі, Швецыі і іншых краін.

“Мы не спынімся ў нашым ціску на рэжым Лукашэнкі. Рэжым павінен панесці адказнасць за ўсе тыя злачынствы, якія здзяйсняюцца ў дачыненні да беларусаў”, — падсумаваў палітык.