14 лютага, Позірк. Кіраўнік Камітэта па нацыянальнай бяспецы і абароне (КНБА) Сейма Літвы Лаўрынас Кашчунас прапанаваў пазбаўляць пасведчанняў на жыхарства расіян і беларусаў, якія часцей, чым раз на месяц, ездзяць на радзіму, паведамляе LRT.
Акрамя гэтага, кіраўнік КНБА збіраецца зарэгістраваць прапанову аб забароне балатавацца і галасаваць на муніцыпальных выбарах грамадзянам Расіі і Беларусі з пастаянным пасведчаннем на жыхарства ў Літве.
4 снежня 2023 года Кашчунас зарэгістраваў у Сейме праект паправак да дзейнага заканадаўства, якія прадугледжваюць абмежаванне выдачы пасведчання на права жыхарства беларусам (за выключэннем высокакваліфікаваных работнікаў), але адначасова палягчаюць умовы для атрымання нацыянальнай візы па гуманітарных меркаваннях.
8 студзеня 2024 года ён заявіў, што ў парламенце Літвы не хапае галасоў, каб уніфікаваць нацыянальныя санкцыі для грамадзян Беларусі з тымі абмежаваннямі, якія дзейнічаюць у адносінах да расіян.
Сойм Літвы 12 лютага перанёс на вясновую сесію разгляд законапраекта аб прадаўжэнні абмежаванняў у адносінах да грамадзян Беларусі і Расіі, вынікае з інфармацыі на сайце заканадаўчага органа.
Праект закону прадугледжвае дадатковыя праверкі грамадзян Беларусі на мяжы ў Літвой.
У прыватнасці, беларусаў, якія прыбываюць па шэнгенскай візе, будуць правяраць на прадмет пагрозы грамадскаму парадку, унутранай бяспецы, здароўю насельніцтва, міжнародным адносінам.
Калі закон будзе прыняты ў прапанаваным выглядзе, ён будзе дзейнічаць з 3 траўня 2024 года па 2 траўня 2025-га.
31 студзеня ўрад Літвы ўхваліў прапанову падоўжыць абмежаванні, якія дзейнічаюць у дачыненні да грамадзян Расіі, яшчэ на адзін год і ўзмацніць жорсткасць праверкі беларускіх грамадзян, якія прыбываюць у краіну.
11 студзеня міністр замежных спраў Габрыэлюс Ландсбергіс заявіў, што перад Дэпартаментам дзяржаўнай бяспекі (ДДБ) Літвы пастаўлена “нерэальная задача” правяраць кожнага грамадзяніна Беларусі, які ўязджае ў краіну з мэтай застацца там на пастаяннае месца жыхарства.
У канцы 2023 года Сейм ухваліў, а прэзідэнт Гітанас Наўседа падпісаў папраўкі да закона аб прававым статусе замежнікаў, якія сярод іншага дазваляюць выдаваць беларусам, якія прыбылі краіну пры пасярэдніцтве МЗС, від на жыхарства па гуманітарных прычынах не на адзін, а на тры гады. КНБА выступаў супраць гэтай прапановы.
Закон аб абмежавальных мерах, звязаны з парадкам уезду і легалізацыі ў Літве, набыцці нерухомасці і іншымі пытаннямі, быў прыняты ў красавіку мінулага года. На этапе разгляду дакумент быў значна больш мяккім у дачыненні да беларусаў, большасць санкцый закранула расіян.
Наўседа наклаў на закон вета і прапанаваў парламенту зраўнаваць санкцыі для беларусаў і расіян. Сойм адхіліў вета і зацвердзіў дакумент без прапановаў кіраўніка дзяржавы. Палітык сваю пазіцыю не змяніў, але на восеньскую сесію парламента пытанне аб уніфікацыі абмежавальных мер не вынесла.
