2 сакавіка, Позірк. Супрацоўнікі грузінскай паліцыі і Службы дзяржаўнай бяспекі затрымалі паводле абвінавачання ў злачынствах, звязаных з наркотыкамі, 10 чалавек, сярод якіх грамадзяне Беларусі, Грузіі і Ізраіля, паведамляе партал newsgeorgia.ge са спасылкай на МУС.
Адзначаецца, што сярод іх “двое ўмоўна асуджаных непаўналетніх”, а таксама “яшчэ трое асоб маладзейшых за 30 гадоў”.
Падазраваных затрымалі ў выніку рэйдаў у Тбілісі, прысталічным пасёлку Панічала, а таксама гарадах Батумі і Азургеці на захадзе краіны.
У агульнай складанасці канфіскавана 440 таблетак экстазі, да 3 кг опію-сырцу, какаін, марыхуана, гашыш, субаксін, амфетамін ды інш. У дамах двух фігурантаў у Панічале сілавікі знайшлі 2,8 млн расійскіх рублёў, 97,3 тыс. долараў і 6 тыс. лары. У рэгіёне Аджарыя (цэнтр — Батумі) у доме аднаго з падазраваных выявілі “матэрыялы, неабходныя для пакавання наркотыкаў, электрычныя шалі, сігнальны пісталет і патроны”.
Вядзецца расследаванне на падставе чатырох крымінальных артыкулаў, сукупным пакараннем паводле якіх можа стаць нават пажыццёвае зняволенне.
