Пасля тэракта ў РФ Лукашэнка і Пуцін “пацвердзілі гатоўнасць” разам рэагаваць на пагрозы

23 сакавіка, Позірк. Гатоўнасць да “далейшага актыўнага ўзаемадзеяння” і “падтрымання кантактаў” паміж спецслужбамі для “эфектыўнага рэагавання на пагрозы тэрарызму і экстрэмізму” пацвердзілі Аляксандр Лукашэнка і Уладзімір Пуцін падчас тэлефоннай размовы 23 сакавіка.

Лукашэнка, як перадае яго прэс-служба, асабіста выказаў расійскаму лідару спачуванні ў сувязі з тэрактам, які адбыўся напярэдадні ў канцэртнай зале “Крокус Сіці Хол” у падмаскоўным Краснагорску.

У зале, якая змяшчае 7.300 гледачоў, сабраліся прыхільнікі гурта “Пікнік”, канцэрт не паспеў пачацца.

У будынак увайшлі ўзброеныя людзі. У выніку страляніны і ахапіўшага будынак пажару загінула сама меней 115 чалавек, пацярпела — больш за 100, сведчаць актуальныя даныя расійскіх службаў і СМІ. Дакладная колькасць ахвяр пакуль невядомая.

Амбасада Беларусі ў РФ заклікала суайчыннікаў, якія знаходзяцца ў Маскве і Маскоўскай вобласці, захоўваць спакой, давяраць афіцыйным крыніцам інфармацыі і выконваць патрабаванні праваахоўных органаў.

Паводле інфармацыі амбасадара Дзмітрыя Крутога, пасля тэракта адзін беларускі грамадзянін знаходзіцца ў вельмі цяжкім стане, за яго жыццё змагаюцца медыкі.

Спачуванні ў сувязі з трагедыяй выказаў Аляксандр Лукашэнка, іх сталі масава выказваць беларускія чыноўнікі і ведамствы.

Таксама спачуванне распаўсюдзіла прэс-служба дэмакратычнага лідара Святланы Ціханоўскай.

МУС Беларусі і Мінскі метрапалітэн заявілі пра ўзмацненне мер бяспекі.

Міністэрства аховы здароўя Беларусі прапанавала дапамогу расійскім калегам.

“Спланаванай і свядомай правакацыяй расійскіх спецслужбаў па ўказанні [Уладзіміра] Пуціна” назвала тое, што адбылося, Галоўнае выведвальнае ўпраўленне Міністэрства абароны Украіны.