24 кастрычніка, Позірк. Міністэрства па надзвычайных сітуацыях на пасяджэнні калегіі 24 кастрычніка выдала ліцэнзію на прамысловую эксплуатацыю другога энергаблока Беларускай АЭС.
“МНС пераканалася, што ўсталяваныя праектам станцыі ліміты і ўмовы бяспечнай эксплуатацыі пацверджаныя і абгрунтаваныя, а рашэнні, закладзеныя ў эксплуатацыйную і супрацьаварыйную дакументацыю, адпавядаюць патрабаванням па бяспецы, — паведамляе прэс-служба ведамства. — Выдача ліцэнзіі на эксплуатацыю энергаблока № 2 заканчвае шматгадовую працу ўсіх зацікаўленых па стварэнні ў нашай краіне сучаснай інфраструктуры ядзернай і радыяцыйнай бяспекі”.
Цяпер камісія на чале з віцэ-прэм’ерам Пятром Пархомчыкам павінна ацаніць аб’ект і вырашыць, зацвярджаць акт прыёму другога блока БелАЭС ці не.
Калі ў чэрвені 2021 года вырашалася такое ж пытанне па першым блоку, паміж выдачай ліцэнзіі і падпісаннем акта прайшло 8 дзён.
Беларуская АЭС узводзіцца паблізу Астраўца (Гродзенская вобласць) пераважна за кошт крэдыту Расіі паводле расійскага праекта ВВЭР-1200. Генеральным праекціроўшчыкам і генпадрадчыкам выступае інжынірынгавая кампанія “АСЭ”, якая з’яўляецца галаўной арганізацыяй інжынірынгавага дывізіёна расійскай дзяржкарпарацыі “Расатам”.
Першы блок сілкуе энергасістэму з 3 лістапада 2020 года (прамыслова эксплуатуецца з чэрвеня 2021-га). 6 кастрычніка 2023-га на аб’екце пачаўся чарговы планава-папераджальны рамонт. На перыяд яго правядзення блок адлучаны ад сеткі.
Другі энергаблок працуе ў рэжыме доследна-прамысловай эксплуатацыі, вырабляе электраэнергію з 13 траўня гэтага года. У сярэдзіне кастрычніка завяршыліся фінальныя 15-дзённыя выпрабаванні яго абсталявання, вынікі якіх “Расатам” ацаніў станоўча.
