Дзень Волі адлюстроўвае “няспыннае імкненне” беларусаў да свабоды і незалежнасці — Наўседа
25 сакавіка, Позірк. “Няспыннае імкненне да свабоды, незалежнасці і суверэнітэту” адлюстроўвае Дзень Волі, які адзначаецца беларусамі 25 сакавіка, гэтае свята “вельмі важнае для ўсіх людзей, якія цэняць правы чалавека і дэмакратыю”, заявіў прэзідэнт Літвы Гітанас Наўседа.
“Як вашы суседзі, мы ўважліва назіраем за вашай мужнай барацьбой за гэтыя агульначалавечыя каштоўнасці. Вашыя рашучасць і вытрымка натхняюць многіх людзей і пастаянна нагадваюць усёй міжнароднай супольнасці пра важнасць салідарнасці народаў і паслядоўнай падтрымкі тых, хто дамагаецца сваіх фундаментальных правоў”, — гаворыцца ў віншаванні, апублікаваным на сайце літоўскага прэзідэнта.
Паводле яго слоў, 25 сакавіка — гэта “дзень разважанняў пра еўрапейскую будучыню Беларусі, дзе ўсе беларусы будуць карыстацца ўсімі свабодамі і магчымасцямі, якіх яны заслугоўваюць”. Наўседа падкрэсліў, што “Літву і Беларусь аб’ядноўвае агульная стогадовая гісторыя, агульная культурная спадчына і цесныя чалавечыя адносіны”.
Прэзідэнт Літвы заявіў, што яго краіна “актыўна падтрымлівае беларускую грамадзянскую супольнасць і імкнецца спрыяць таму, каб галасы беларусаў былі пачутыя міжнароднай супольнасцю”.
“Сёння, як і кожны дзень, я хачу яшчэ раз запэўніць, што падтрымка Літвой дэмакратычнай Беларусі, яе незалежнасці і суверэнітэту непахісная. Мы падтрымліваем жаданне ўсяго народа Беларусі жыць у вольнай і дэмакратычнай дзяржаве”, — адзначыў літоўскі лідар, пажадаўшы беларусам “заставацца моцнымі і адзінымі перад тварам усіх выклікаў і прадаўжаць змагацца за свабоду сваёй краіны, не дазваляючы выкарыстоўваць сваю дзяржаву ў вайсковай агрэсіі супраць Украіны”.
16 лютага, віншуючы народ Літвы з днём аднаўлення літоўскай дзяржавы, Аляксандр Лукашэнка выказаў надзею на паляпшэнне адносін з гэтай балтыйскай краінай, абвінаваціўшы ў існуючых праблемах палітыкаў.
Адносіны Беларусі і Літвы рэзка пагоршыліся пасля сфальсіфікаваных Мінскам прэзідэнцкіх выбараў 2020 года, масавых пратэстаў, якія пачаліся пасля іх і на якія рэжым Лукашэнкі адказаў небывалымі па маштабе рэпрэсіямі, што не спыняюцца дагэтуль. Літва стала цэнтрам прыцягнення для апанентаў уладаў у Мінску, у Вільнюсе знаходзіцца офіс беларускага дэмакратычнага лідара Святланы Ціханоўскай.
Пасля рэжым Лукашэнкі неаднакратна даваў падставы літоўскім уладам рабіць больш жорсткай пазіцыю ў дачыненні да афіцыйнага Мінска: міграцыйны крызіс на межах ЕС, прымусовая пасадка ў беларускай сталіцы самалёта Ryanair, які ляцеў з Афін у Вільнюс, падтрымка агрэсіі РФ супраць Украіны, размяшчэнне на сваёй тэрыторыі расійскай тактычнай ядзернай зброі і наймітаў групоўкі “Вагнер”. Лічачы ўсё гэта пагрозай нацыянальнай бяспецы, улады Літвы сталі адным з галоўных лабістаў узмацнення жорсткасці санкцый супраць рэжыму Лукашэнкі.