Беларусь у студзені — лютым купіла тавараў амаль на паўмільярда долараў больш, чым прадала

5 красавіка, Позірк. Знешнегандлёвы абарот тавараў у студзені — лютым 2024 года склаў 13 млрд 139,6 млн долараў — на 2,1% больш, чым за аналагічны перыяд 2023-га, сведчаць даныя Нацыянальнага статыстычнага камітэта.

Экспарт за два месяцы дасягнуў 6 млрд 328,8 млн долараў (+2%), імпарт — 6 млрд 810,8 млн (+2,2%). Адмоўнае сальда — 482 млн долараў (у студзені — лютым 2023-га яно было -439,3 млн долараў).

У студзені адмоўнае сальда складала 166,1 млн долараў.

Знешнегандлёвы абарот тавараў у 2023 годзе склаў 83 млрд 424,5 млн долараў (+8,6%): экспарт — 40 млрд 168,2 млн (+4,7%), імпарт — 43 млрд 256,3 млн (+12,4%). Адмоўнае сальда склала 3 млрд 88,1 млн долараў.

4 красавіка Аляксандр Лукашэнка заявіў, што “калі нармальна працаваць, можна і ў Еўропу прадаваць, куды заўгодна”. Паводле яго слоў, “цяпер шалеюць нашы” збеглыя”, або з падачы “збеглых” Захад пачынае глядзець: як гэта так, мы павялічылі па некаторых таварных групах у 3–5 разоў тавараабарот з той жа Польшчай, якая ледзь не ворагам малюецца ў Беларусі. Які яна вораг? Для бізнесу няма сяброў і ворагаў. Ёсць інтарэсы. Яны і ў Польшчы, і ў Германіі, і ў Еўрасаюзе ў цэлым ёсць. Але з імі трэба акуратна працаваць”.

11 лютага ў эфіры тэлеканала АНТ пасол Беларусі ў РФ Дзмітрый Круты падкрэсліў, што заходнія санкцыі паслужылі “трыгерам росту паставак” беларускіх тавараў на расійскі рынак.