10 чалавек пацярпела пры сутыкненні маршруткі з трактарам у Мастоўскім раёне

6 красавіка, Позірк. 10 пасажыраў маршрутнага таксі пацярпела ў выніку аварыі, якая здарылася раніцай 6 красавіка ў Мастоўскім раёне (Гродзенская вобласць), паведамляе прэс-служба Следчага камітэта.

Паводле папярэдніх звестак, 41-гадовы кіроўца мікрааўтобуса Mercedes каля вёскі Лунно выехаў на сустрэчную паласу і сутыкнуўся з трактарам. На месцы здарэння працуюць следчыя.

Прэс-служба Міністэрства аховы здароўя паведаміла, што на месца аварыі “ў раёне вёскі Жылічы” (знаходзіцца за некалькі кіламетраў ад Лунно) выехалі дзве фельчарскія і дзве ўрачэбныя брыгады з Гродна і Мастоў.

“У выніку ДТЗ пацярпелі 10 чалавек, з іх двое дзяцей-падлеткаў, — гаворыцца ў паведамленні. — Усе яны агледжаныя медыкамі і атрымалі неабходную дапамогу на месцы. Дзевяць чалавек з рознымі траўмамі дастаўленыя ў лячэбныя ўстановы абласнога цэнтра (універсітэцкую клініку, дзіцячую клінічную бальніцу і БХМД Гродна), Мастоўскую ЦРБ”.

Паводле інфармацыі ведамства, у пацярпелых “закрытыя чэрапна-мазгавыя траўмы, пераломы канечнасцей, носа, а таксама ўдары”.

Стан усіх пацыентаў стабільны.