Лукашэнка абвінаваціў Украіну ў абвастрэнні адносін
Уладзімір Зяленскі і Аляксандр Лукашэнка ва ўкраінскім Жытоміры (4 кастрычніка 2019 года).
8 красавіка, Позірк. Аляксандр Лукашэнка “не разумее, навошта ўкраінцам абвастраць адносіны з Беларуссю”. Аб гэтым ён заявіў 8 красавіка пры прызначэнні Уладзіміра Пярцова намеснікам кіраўніка сваёй адміністрацыі.
У гэтым кантэксце ён згадаў “небаракаў”, якіх, паводле яго слоў, “закінулі ва Украіну” і “назвалі палком Каліноўскага”. Паводле сцвярджэння Лукашэнкі, у падраздзяленні зараз “больш за сотню чалавек”.
“У гэтай сітуацыі, калі дзве дзяржавы і адзін народ фактычна сутыкнуліся лоб у лоб, заўжды патрэбна трэцяя сіла. І ў дадзеным выпадку так вымалёўвалася, што Беларусі будзе патрэбна міралюбная і спакойная Расія і Украіна. Але я гляджу, што няхай нават тонка, акуратна Валодзя Зяленскі пачынае нас прыфастрыгоўваць і чапляць незразумела да якіх працэсаў. Вось я не ведаю навошта Уладзіміру Аляксандравічу Зяленскаму гэта”, — заявіў, паводле відэазапісу ў тэлеграм-канале “Пул Первого”, Лукашэнка.
11 сакавіка камандзір беларускага добраахвотніцкага фарміравання “Полк імя Кастуся Каліноўскага” (ПКК), які ваюе супраць Расіі на баку Украіны, Дзяніс Прохараў, заявіў, што колькасць падраздзяленняў складае каля 5 тыс. чалавек.
Амерыканскі Інстытут Роберта Лансінга са спасылкай на неназванага “прадстаўніка еўрапейскай разведкі” заявіў 3 красавіка, што Крэмль “працуе над арганізацыяй тэрактаў на тэрыторыі Беларусі, каб ускласці віну на полк Каліноўскага”.
Батальён імя Кастуся Каліноўскага быў створаны 9 сакавіка 2022 года. 26 сакавіка таго ж года ён увайшоў у склад Узброеных сіл Украіны (ВСУ), а 21 траўня было абвешчана аб яго трансфармацыі ў полк у складзе двух батальёнаў — “Волат” і “Тэрор”. Пазней быў сфарміраваны трэці — “Літвін”. Пасля “Тэрор” стаў асобным падраздзяленнем ВСУ па-за складам палка.
25 верасня 2023 года ПКК абвясціў аб стварэнні новага батальёна “Western” з удзелам замежнікаў, у склад якога ўвайшлі “афіцэры краін НАТО і замежныя грамадзяне, якія маюць баявы вопыт у Іраку і Афганістане”.
У Беларусі па факце стварэння палка Каліноўскага распачата крымінальная справа, ён прызнаны “экстрэмісцкім фармаваннем”.
Пра гібель двух байцоў батальёна “Волат” полк Каліноўскага паведаміў 7 красавіка. У сакавіцкай справаздачы палка з нагоды двухгоддзя стварэння гаварылася ўвогуле аб 19 загінулых салдатах.
24 лютага 2022 года Расія здзейсніла ўзброенае ўварванне на тэрыторыю Украіны, пачаўшы найбуйнейшы ў Еўропе ваенны канфлікт з часоў Другой сусветнай вайны. Напад ажыццяўляўся ў тым ліку з тэрыторыі Беларусі.