Лукашэнка звярнуў “асаблівую ўвагу” кіраўніка МЗС Узбекістана на стварэнне сумесных прадпрыемстваў

11 красавіка, Позірк. Аляксандр Лукашэнка звярнуў “асаблівую ўвагу” міністра замежных спраў Узбекістана Бахціёра Саідава на стварэнне сумесных з Беларуссю прадпрыемстваў падчас сустрэчы 11 красавіка ў Мінску.

“Давайце будзем прадметна ў гэтым кірунку працаваць. Мы ў гэтым зацікаўленыя. У нас ёсць што прапанаваць Узбекістану. Думаю, што будучы тут, у Беларусі, калі вы захочаце паглядзець нейкія нашы прадпрыемствы, калі ласка, мы арганізуем у любы час наведванне любога прадпрыемства. Каб вы маглі пераканацца, што яго прадукцыя прымальная для ўжывання ва Узбекістане”, — цытуе Лукашэнку яго прэс-служба.

Ён нагадаў, што падчас візіту ў Ташкент (8 лютага Лукашэнка быў прыняты прэзідэнтам Узбекістана Шаўкатам Мірзіёевым. — “Позірк”.) былі пастаўленыя “амбіцыйныя планы — дасягнуць абароту ў гандлі ў мільярд долараў”.

“Я думаю, у нас няма часу, каб кудысьці адступаць, ды і не трэба. Мы гатовыя адыграць сваю ролю, спадзяюся, што і Узбекістан таксама прыкладзе максімум намаганняў”, — сказаў ён.

Лукашэнка таксама падзякаваў Узбекістану за падтрымку Беларусі “на яе шляху да сяброўства ў Шанхайскай арганізацыі супрацоўніцтва”.

12 сакавіка спецпрадстаўнік прэзідэнта Расіі па справах ШАС Бахціёр Хакімаў заявіў, што 4 ліпеня колькасць дзяржаў — членаў Шанхайскай арганізацыі супрацоўніцтва ўзрасце да 10 за кошт Беларусі.

Беларусь інтэгруецца ў ШАС амаль 15 гадоў: у 2010 годзе атрымала статус партнёра арганізацыі, у 2015-м — назіральніка.

У ліпені 2022 года Мінск падаў заяўку на ўступленне ў ШАС. У верасні прэзідэнт Узбекістана Шаўкат Мірзіёеў паведаміў на саміце арганізацыі, што пачалася працэдура надання Беларусі статусу паўнапраўнага чальца.