У Калеснікавай “вельмі моцныя праблемы са здароўем” — заснавальніца ініцыятывы “Палітвязынка”
11 красавіка, Позірк. Палітзняволеная Марыя Калеснікава зазнае “моцныя праблемы са здароўем, у тым ліку высокі ціск”, паведаміла 11 красавіка на анлайн-дыскусіі пра жанчын у няволі заснавальніца ініцыятывы “Палітвязынка” Яўгена Доўгая, адказваючы на пытанне “Позірку”.
Паводле інфармацыі, атрыманай у тым ліку ад тых, хто вызваліўся з месцаў пазбаўлення волі, Калеснікавай “не аказваюць неабходную медыцынскую дапамогу”.
Прыгавораная 6 верасня 2021 года да 11 гадоў пазбаўлення волі Марыя Калеснікава была спікерам і кіраўніцай выбарчага штаба былога старшыні праўлення “Белгазпрамбанка” Віктара Бабарыкі на прэзідэнцкіх выбарах 2020 года. Пасля затрымання экс-банкіра далучылася да каманды Святланы Ціханоўскай і стала адной з прадстаўніц аб’яднанага штаба нараўне з Веранікай Цапкала, жонкай яшчэ аднаго прэтэндэнта на пасаду прэзідэнта Валерыя Цапкалы.
У лістападзе 2022 года Калеснікаву экстрана прааперавалі ў Гомельскай гарадской клінічнай бальніцы хуткай медыцынскай дапамогі, куды яе даставілі ў цяжкім стане. У палітзняволенай дыягнаставалі перытаніт (запаленне брушыны), які стаў ускладненнем прабадной язвы.
Праз інфармацыйную блакаду, якую чыніць адміністрацыя калоніі, інфармацыі пра яе стан практычна няма.
Падрабязнасці даступныя падпісчыкам “Позірк+”