У Мінску на аўкцыён выставяць ваенны верталёт Мі-8МТ

16 красавіка, Позірк. На аўкцыён у Мінску выставяць ваенны верталёт Мі-8МТ (мадыфікаваны транспартны), таргі пройдуць 25 красавіка, паведамляе РУП “Белспецкантракт”, якое займаецца рэалізацыяй матэрыяльных рэсурсаў Мінабароны.

Гаворка ідзе пра верталёт 1986 года выпуску, які знаходзіцца на захоўванні ў Мачулішчах (Мінскі раён), на балансе 50-й змяшанай авіяцыйнай базы.

Згодна з апублікаваным паведамленнем, пачатковы кошт лота (на фота ў яго адсутнічаюць лопасці) — 550 тыс. рублёў (каля 168 тыс. долараў). Машына налятала 3.176 гадзін, адносіцца да 4-й катэгорыі прыдатнасці і праходзіла другі капітальна-аднаўленчы рамонт у 2008 годзе.

У правілах правядзення аўкцыёну гаворыцца, што да ўдзелу ў таргах дапускаюцца юрыдычныя асобы, індывідуальныя прадпрымальнікі і фізічныя асобы, “якія аплацілі задатак (у памеры 100 тыс. рублёў), гарантыйны дэпазіт”, якія падалі заяву на ўдзел у аўкцыёне і іншыя неабходныя дакументы да 15.00 гадзін 22 красавіка.

Шматмэтавы верталёт Мі-8 з’яўляецца найбольш распаўсюджаным верталётам “сярэднецяжкага” класа ў свеце. З 1965 года ў СССР выпушчана звыш 7,5 тыс. гэтых машын, вытворчасць працягваецца ў Расіі і дагэтуль. Ён лётае практычна на ўсіх кантынентах, выкарыстоўваецца як ваенны (у транспартным і ударна-транспартным варыянтах) і грамадзянскі верталёт.