МУС заявіла пра затрыманне “актыўнага ўдзельніка дэструктыўных тэлеграм-каналаў” з арсеналам

17 красавіка, Позірк. У Баранавічах (Брэсцкая вобласць) затрыманы 27-гадовы мясцовы жыхар, які прыцягнуў увагу як “актыўны ўдзельнік дэструктыўных тэлеграм-каналаў”, паведаміла 17 красавіка прэс-служба МУС са спасылкай на начальніка аддзела ГУБАЗіК Яўгена Пілецкага.

Міліцэйскі чыноўнік у відэакаментарыі адзначыў, што пасля нядаўняга тэракту ў падмаскоўным “Крокус Сіці Холе” ў Беларусі “ўведзеныя падвышаныя меры па забеспячэнні бяспекі грамадзян”, у прыватнасці “ўзмоцнены маніторынг інтэрнэт-прасторы”.

Затрыманы, паводле яго слоў, у інтэрнэце паказаў сябе чалавекам, які “мае глыбокія веды ў стралковай зброі, вырабе гаручых сумесяў і выбуховых рэчываў, а таксама тактыцы іх выкарыстання”.

“Пры аглядзе месца яго жыхарства знойдзеная вялікая колькасць стралковай зброі і боепрыпасаў: пісталеты, кулямёты, гранаты, патроны, а таксама сродкі сувязі і халодная зброя. Увесь арсенал канфіскаваны і накіраваны на экспертызу. Мужчына прызнаўся, што займаецца чорным капальніцтвам і калекцыянуе зброю”, — сказаў Пілецкі.

Апрача кадраў аператыўнай здымкі МУС паказала фрагмент допыту затрыманага падчас вобшуку. “Пачаў паціху збіраць гільзы, усю гэтую вайсковую атрыбутыку. Потым макеты пачаў збіраць з гранатамі”, — кажа на відэазапісе мужчына, чый твар адмыслова размыты.

Паводле слоў прадстаўніка ГУБАЗіК, затрыманы прызнаўся, што “некалькі гадоў ужывае асабліва небяспечнае псіхатропнае рэчыва — мефедрон”.

“Цяпер праводзіцца праверка, прызначаны шэраг экспертыз. Дзеянням затрыманага следчымі будзе дадзена прававая ацэнка”, — сказаў Пілецкі.

Міліцэйскі начальнік заявіў, што ў МУС дастаткова тэхнікі і метадаў, каб “эфектыўна ідэнтыфікаваць зламыснікаў”, і “ніякія сродкі ананімізацыі не дапамогуць”. “Дойдзем да кожнага”, — завяршыў ён пагрозай свой каментарый.