BySol эвакуяваў з Беларусі экс-палітзняволеную Чаранкову

18 красавіка, Позірк. Антыфашыстка, вакалістка мазырскага гурта “VIKT(A)R xOi!” і былая палітзняволеная Крысціна Чаранкова пакінула Беларусь праз пагрозу пераследу, паведаміў 17 красавіка на сваёй старонцы ў “Фэйсбуку” сузаснавальнік фонду салідарнасці BySol Андрэй Стрыжак.

“Крысціна Чаранкова на волі і ў бяспецы <…>, — напісаў Стрыжак. — Мы можам ратаваць людзей толькі дзякуючы вашай падтрымцы!”

Актывістка выйшла на волю 11 красавіка з гомельскай папраўчай калоніі №4, цалкам адбыўшы тэрмін зняволення.

Яе затрымалі разам з мужам 22 сакавіка 2022 года.

10 лістапада Гомельскі абласны суд пачаў разглядаць крымінальную справу.

На судзе Чаранкова паведаміла, што ў жніўні 2020 года сілавікі затрымалі і збілі бацькоў яе мужа, таму яна пачала негатыўна ставіцца да міліцыі. Жанчыну абвінавацілі ў тым, што яна “пісала ў “Інстаграме” ў 2020 годзе такія выразы, як “віншую беларускіх міліцыянераў з іх Дном”, “агульнавядомы факт — мусара горш г…на”, “добры мент — мёртвы мент” і інш.

16 лістапада суддзя Аляксей Хлышчанкаў прыгаварыў Чаранкову да 2,5 года пазбаўлення волі ва ўмовах агульнага рэжыму паводле ч. 1 арт. 130 Крымінальнага кодэкса (распальванне расавай, нацыянальнай, рэлігійнай альбо іншай сацыяльнай варожасці або варажнечы).

11 красавіка 2022 года праваабаронцы прызналі Чаранкову палітзняволенай.

8 траўня таго ж года стала вядома, што змест яе старонкі ў “Інстаграме” (больш за 5 тыс. падпісчыкаў), прызнаны “экстрэмісцкімі матэрыяламі”.

17 лютага 2023 года Чаранкова ўключаная ў спіс “асоб, якія маюць дачыненне да экстрэмісцкай дзейнасці”.