У Польшчы злачынствы рэжыму Лукашэнкі расследуюцца як палітычны і дзяржаўны тэрарызм — НАУ

19 красавіка, Позірк. Аб ходзе разгляду заяў беларусаў паводле фактаў учыненых у дачыненні да іх злачынстваў рэжымам Аляксандра Лукашэнку праінфармаваў кіраўніка Народнага антыкрызіснага ўпраўлення (НАУ) Паўла Латушку ўпаўнаважаны па правах чалавека (амбудсмен) Польшчы Марцін Вёнцэк, паведаміла “Позірку” прэс-служба НАУ.

Паводле інфармацыі НАУ, Нацыянальнай пракуратурай Польшчы праводзяцца крымінальна-працэсуальныя дзеянні ў адносінах да Лукашэнкі і службовых асоб у яго падпарадкаванні, звязаных са здзяйсненнем злачынстваў супраць нацыянальнай і палітычнай груп і іншых асоб.

“Следства ажыццяўляецца на падставе рашэння намесніка Генеральнага пракурора Польшчы па пытаннях арганізаванай злачыннасці і карупцыі. Для расследавання ўказаных злачынстваў створана сумесная следчая група, удзельнікамі якой, акрамя Польшчы, з’яўляюцца Літва і Германія”, — удакладнілі ў прэс-службе.

У сваім лісце ў адрас НАУ Вёнцэк зазначыў, што цяпер у аддзеле па барацьбе з арганізаванай злачыннасцю і карупцыяй Нацыянальнай пракуратуры Польшчы ў Любліне знаходзяцца на разглядзе справы па фактах злачынстваў у дачыненні як беларускіх, так і замежных грамадзян.

Размова ідзе аб забойствах, прычыненні цяжкай шкоды здароўю, “наўмысным стварэнні ўмоў жыцця, разлічаных на поўнае або частковае фізічнае знішчэнне нацыянальнай або палітычнай групы з боку арганізаванай узброенай злачыннай групы, у склад якой уваходзілі Аляксандр Лукашэнка” і іншыя паіменна названыя службовыя асобы, у мэтах “рэалізацыі дзяржаўнай палітыкі, якая ўяўляе сабой палітычны тэрарызм, які падтрымліваецца дзяржаўным тэрарызмам”.

Узгадваецца захоп самалёта авіякампаніі Ryanair 21 чэрвеня 2021 года ў аэрапорце Мінска.

Таксама расследуецца “гандаль людзьмі шляхам эксплуатацыі грамадзян Ірака і іншых нацыянальнасцей”. Размова ідзе аб арганізацыі вярбоўкі, перавозкі, дастаўкі, перадачы, укрывальніцтва або прыёму асоб з-за межаў тэрыторыі Беларусі за ўзнагароджанне з мэтай прымусу іх да незаконнага перасячэння граніцы Беларусі з краінамі Еўрапейскага саюза.

У лісце Вёнцэка названыя дзеянні звязваюць з Лукашэнкам “у якасці кіруючага выканаўцы з выкарыстаннем падпарадкаванай яму дзяржаўнай адміністрацыі і беларускіх турыстычных агенцтваў, якія дзейнічаюць па даручэнні дзяржаўнай адміністрацыі”, адзначае НАУ.

Таксама расследуюцца факты “гвалту і пагроз у адносінах да груп і асобных асоб паводле прыкметы іх нацыянальнай і палітычнай прыналежнасці, аб’яднаных вакол дэмакратычнай бел-чырвона-белай сімволікі Беларусі, з боку Аляксандра Лукашэнкі і іншых устаноўленых службовых асоб, у тым ліку з выкарыстаннем незаконных і карных. пагрозаў праз сродкі масавай інфармацыі, інтэрнэт-парталы, месэнджэры, якія ўказваюць на магчымасць учынення злачынстваў супраць здароўя і жыцця асоб, якім пагражаюць, і членам іх сем’яў”.

Вёнцэк запэўніў Латушку, што працягне назіраць за ходам следства ў мэтах забеспячэння захавання правоў і грамадзянскіх свабод.

“Працяг працы пракуратурай Польшчы па магчымым прыцягненні Лукашэнкі і яго саўдзельнікаў, якія маюць дачыненне да ўчынення злачынстваў у дачыненні да грамадзян Беларусі і іншых краін, мае важнае значэнне для дасягнення мэт непазбежнасці пакарання за ўчыненыя прадстаўнікамі рэжыму ў Беларусі цяжкія і асабліва цяжкія злачынствы”, — пракаментаваў Латушка .

“Па ўсіх вышэйзгаданых справах мы таксама давалі доказы і давалі паказанні сведак. Мы працягнем ажыццяўляць усе магчымыя дзеянні для забеспячэння прававога пераследу Лукашэнкі і ў межах існуючых пяці міжнародных механізмаў, якія існуюць”, — сказаў палітык.