Лукашэнка распарадзіўся арганізаваць у Беларусі адпачынак больш за 400 дзяцей з шасці краін

23 красавіка, Позірк. Аляксандр Лукашэнка падпісаў распараджэнне ад 22 красавіка № 76рп аб выдзяленні сродкаў для арганізацыі адпачынку 413 дзяцей з Егіпта, Кітая, Кыргызстана, Лаоса, Сірыі і Узбекістана ў Нацыянальным дзіцячым адукацыйна-аздараўленчым цэнтры “Зубраня”.

Дзеці пройдуць медыцынскае абследаванне, “атрымаюць неабходнае санаторна-курортнае лячэнне, наведаюць культурныя мерапрыемствы і знакавыя гістарычныя аб’екты ў Мінску і рэгіёнах”, паведаміла прэс-служба Лукашэнкі.

Дзяцей з “дружалюбных дзяржаў” “арганізавана запрашаюць у Беларусь на адпачынак штогод з 2017 года”, гаворыцца ў рэлізе.

“Гэта садзейнічае ўмацаванню і развіццю двухбаковага супрацоўніцтва ў гуманітарна-адукацыйнай сферы, папулярызацыі турыстычнага патэнцыялу, гісторыі і культуры Беларусі, а таксама прасоўванню яе пазітыўнага іміджу ў міжнародных адносінах”, — сцвярджае прэс-служба.

“Зубраня” знаходзіцца ў Мядзельскім раёне Мінскай вобласці на тэрыторыі Нацыянальнага парку “Нарачанскі”.

Афіцыйны Мінск абвінавачваецца Кіевам і дэмсіламі ў арганізацыі прымусовага вывазу дзяцей з акупаваных украінскіх тэрыторый у Беларусь “на аздараўленне”. Улады і датычныя арганізацыі сцвярджаюць, што дзяцей прывозяць са згоды бацькоў.