Фотажурналіст Васюковіч эвакуяваны з Беларусі

24 красавіка, Позірк. Фотажурналіст Аляксандр Васюковіч пакінуў Беларусь пры садзейнічанні службы эвакуацыі фонду салідарнасці BySol.

Цяпер ён “знаходзіцца ў бяспецы”, паведамляе Беларуская асацыяцыя журналістаў.

18 студзеня суд Фрунзенскага раёна Мінска (суддзя Юлія Крэпская) прыгаварыў Васюковіча да 3 гадоў абмежавання волі без накіравання ў папраўчую ўстанову адкрытага тыпу (ПУАТ). Яго прызналі вінаватым паводле арт. 342 Крымінальнага кодэкса (арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх). Такое абвінавачванне часцей за ўсё прад’яўляецца за ўдзел у акцыях пратэсту.

У 2020 годзе фотажурналіста некалькі разоў судзілі па адміністрацыйных справах за ўдзел у “несанкцыянаваных масавых мерапрыемствах”.

Аляксандр Васюковіч — фотажурналіст-фрылансер, лаўрэат прафесійных конкурсаў, супрацоўнічаў з рознымі медыя.