Пра чарнобыльскую катастрофу важна памятаць, каб падобнае не паўтарылася, заявіла Ціханоўская
Ускладанне кветак да помніка "Маці Чарнобыля" (Вільнюс, 26 красавіка 2024 года)
26 красавіка, Позірк. Пра чарнобыльскую катастрофу важна памятаць, каб такое не паўтарылася, заявіла журналістам дэмакратычны лідар Святлана Ціханоўская 26 красавіка, у 38-ю гадавіну аварыі на ЧАЭС.
Апоўдні палітык разам з прадстаўнікамі амбасад, якія працуюць у Літве, усклала кветкі да помніка “Маці Чарнобыля” ў вільнюскім парку Сапегаў, каб ушанаваць памяць загінулых і пацярпелых ад наступстваў найбуйнейшай у гісторыі чалавецтва тэхнагеннай катастрофы.
“Важна памятаць пра ахвяр, гэта даніна павагі найперш, — падкрэсліла Ціханоўская. — Я ўпэўненая, што большасць беларусаў і ўкраінцаў з’яўляюцца ахвярамі чарнобыльскай катастрофы. Многія адчуваюць наступствы, прымаюць усё жыццё таблеткі”.
Памяць пра здарэнне і яго ахвяр з’яўляецца “задзелам на будучыню, каб пазбегнуць [новых] пагроз ядзерных катастроф”, сказала яна.
На пытанне, ці распрацоўваюць дэмакратычныя сілы якія-небудзь планы рэабілітацыі пацярпелых у выніку аварыі рэгіёнаў Беларусі, Ціханоўская адказала: “Я больш чым упэўненая, што такая праца вядзецца”.
“Шмат было ў Беларусі арганізацый, якія, магчыма, ужо ліквідаваныя, якія займаліся гэтай праблематыкай, — нагадала палітык. — Наколькі я памятаю (баюся памыліцца, я чытала ў навінах), дапамогу матэрыяльную людзям, якія пацярпелі ад чарнобыльскай катастрофы, прыбралі зусім або зменшылі. То бок рэжым паказвае сваё стаўленне да тых герояў, якія некалі ратавалі краіны — Украіну, Беларусь — ад наступстваў ядзернай катастрофы”.
“Я ўдакладню, ці распрацоўваюцца такія рэформы, але дакладна мы ведаем, што астравецкі завод (Беларуская АЭС каля Астраўца ў Гродзенскай вобласці. — “Позірк“.), ён распрацоўваецца з усялякімі парушэннямі. І трэба будзе ў будучыні запрашаць спецыялістаў, каб ацаніць магчымую катастрофу альбо магчымасць працягу [працы] гэтага завода (хоць ён яшчэ не запусціўся, так?), каб не дапусціць трагедыі ў будучыні (першы блок станцыі пачаў сілкаваць энергасістэму ў лістападзе 2020 года, уведзены у прамысловую эксплуатацыю ў чэрвені 2021-га, другі блок — у траўні і лістападзе 2023-га адпаведна. — “Позірк”.)”, — дадала яна.
Ціханоўская папракнула рэжым Аляксандра Лукашэнкі ў безадказным стаўленні да ядзернай сферы.
“Мы бачым як будуецца астравецкая АЭС, няма ніякага кантролю, як яна будуецца. Мы бачым, што рэжым дазваляе размяшчаць у Беларусі ядзерную зброю. Канешне, гэта вялікая пагроза новага Чарнобылю. Але ж увогуле, калі казаць пра палітычную сітуацыю, то можна назваць гэта палітычным Чарнобылем. Мы бачым, як людзей катуюць, як людзей забіваюць — як Чарнобыль, што людзі збягаюць, як ад радыяцыі. Мы павінны, канешне, гэта спыніць, прыкласці ўсе намаганні, каб і новага Чарнобылю не адбылося, і палітычны Чарнобыль скончыўся”, — падсумавала дэмлідар.
38 гадоў таму здарылася аварыя на Чарнобыльскай АЭС
26 красавіка, Позірк. Роўна 38 гадоў таму, 26 красавіка 1986 года ў 1:23, здарылася найбуйнейшая ў гісторыі чалавецтва тэхнагенная катастрофа — аварыя на Чарнобыльскай атамнай электрастанцыі. Нягледзячы на тое, што АЭС размешчана ва Украіне, больш за 70% радыенуклідаў, якія вызваліліся ў выніку …