Былая журналістка catholic.by Ючкавіч прысуджаная да абмежавання волі

26 красавіка, Позірк. Суд Фрунзенскага раёна Мінска (суддзя Юлія Крэпская) прыгараварыў былую журналістку партала Рымска-каталіцкага касцёла ў Беларусі catholic.by 34-гадовую Аксану Ючкавіч да 3 гадоў абмежавання волі без накіравання ў папраўчую ўстанову адкрытага тыпу (ПУАТ), паведамляе ініцыятыва “Хрысціянская візія”.

Яее прызналі вінаватай паводле арт. 342 Крымінальнага кодэкса (арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх).

Ючкавіч вызваленая ў зале суда.

Яна была затрыманая 23 студзеня 2024 года. У гэты і наступны дзень па Беларусі пракацілася хваля ператрусаў і затрыманняў сваякоў палітычных зняволеных, былых палітвязняў і інш. Некаторыя з затрыманняў звязаныя з праектам харчовай дапамогі рэпрэсаваным INeedHelp, які 16 студзеня быў прызнаны “экстрэмісцкім фарміраваннем”.

“Хрысціянская візія” адзначала, што Ючкавіч — “вядомая і паважаная ў рымска-каталіцкай супольнасці ў Беларусі хрысціянская актывістка”. Сярод іншага яна харыстка, была “звеннявой у арганізацыі каталіцкіх скаўтаў” і навучала падлеткаў “паважліва ставіцца да навакольнага свету”, вяла падрыхтоўчы курс польскай мовы ў Міждыяцэзіяльнай семінарыі.

“Шмат сваіх сіл і энергіі верніца аддавала дапамозе іншым людзям, тым, хто меў патрэбу ў дапамозе. Працавала ў хрысціянскім сацыяльным цэнтры дабрачыннай місіі добрага Самараніна ў Мінску”, — паведамляла ініцыятыва.