30 красавіка, Позірк. Міжнародны гуманітарны фонд у падтрымку беларускіх палітвязняў ствараецца з ініцыятывы дэмакратычнага лідара Святланы Ціханоўскай, паведаміў “Позірку” яе галоўны дарадца Франак Вячорка.
Першы ўнёсак робіць Нарвегія. Прэм’ер-міністр гэтай скандынаўскай дзяржавы Ёнас Гар Сторэ на сустрэчы з Ціханоўскай 30 красавіка ў Осла паведаміў, што краіна пералічвае ў фонд 10 млн нарвежскіх крон (850 тыс. еўра).
Фонд накіраваны на падтрымку сем’яў рэпрэсаваных і былых палітвязняў. Гаворка пра медыцынскую дапамогу і рэабілітацыю, матэрыяльную і псіхалагічную дапамогу вызваленым палітвязням і асобам, якія зазналі палітычныя рэпрэсіі. Распараджацца сродкамі фонда будуць беларускія арганізацыі ды ініцыятывы, якія дапамагаюць палітвязням.
Паводле інфармацыі Вячоркі, Міністэрства замежных спраў Нарвегіі працуе над фармалізацыяй працы фонду. Уносіць сродкі змогуць урады краін, міжнародныя арганізацыі і іншыя донары.
З ініцыятывай стварыць такі фонд Ціханоўская выступіла пасля таго як палітзняволены, заснавальнік і кіраўнік праваабарончага цэнтра “Вясна” Алесь Бяляцкі быў уганараваны Нобелеўскай прэміяй міру у 2022 годзе.
Дэмлідар наведвае Нарвегію 29–30 красавіка.
