Ціханоўская наведае Мальту па запрашэнні міністра замежных спраў

2 траўня, Позірк. Святлана Ціханоўская ўпершыню наведае Мальту на запрашэнне міністра замежных спраў гэтай краіны Яна Борга, паведаміў 2 траўня “Позірку” галоўны дарадца дэмакратычнага лідара Франак Вячорка.

Падчас візіту запланаваныя сустрэчы з прэзідэнтам Мальты Мірыям Спітэры Дэбона, спікерам парламента Анджэла Фарруджа.

Паводле слоў Вячоркі, падчас сустрэчы дэмлідара на Мальце са старшынёй Еўрапарламента Рабертай Метсолай плануецца падпісанне пагаднення паміж беларускімі дэмсіламі і ЕП.

Чакаецца, што падчас візіту Ціханоўская абмяркуе з мальтыйскімі палітыкамі рэпрэсіі ў Беларусі, сітуацыю з палітвязнямі, механізмы прыцягнення да адказнасці рэжыму Аляксандра Лукашэнкі, а таксама яго ўдзел у вайне Расіі супраць Украіны.

Акрамя таго, адзначыў Вячорка, будуць абмяркоўвацца праца Аб’яднанага пераходнага кабінета, яго супрацоўніцтва з ЕС, а таксама ўзаемадзеянне з Мальтай, якая старшынюе ў арганізацыі па бяспецы і супрацоўніцтве ў Еўропе у 2024 годзе.