8 траўня, Позірк. Бюро па дэмакратычных інстытутах і правах чалавека (БДІПЧ) АБСЕ адмовілася накіроўваць місію назіральнікаў на прэзідэнцкія выбары ў Літве, якія пройдуць 12 траўня, паведамляе партал навін Delfi.
Прынятае рашэнне БДІПЧ патлумачыла патрабаваннем Вільнюса “выключыць з ліку назіральнікаў грамадзян некаторых краін — членаў АБСЕ”. У бюро падкрэслілі, што запрашэнне місіі з такой умовай з’яўляецца “парушэннем абавязацельстваў, узятых на сябе ўсімі дзяржавамі — удзельнікамі АБСЕ”.
Гаворка ідзе пра назіральнікаў з Беларусі і Расіі. Запрашэнне на выбары прадстаўнікоў гэтых краін у МЗС Літвы назвалі “насмешкай над дэмакратыяй”.
“Літва, выконваючы міжнародныя абавязацельствы, запрасіла назіраць за выбарамі прадстаўнікоў БДІПЧ АБСЕ і краіны АБСЕ, за выключэннем агрэсара Расіі і яе саўдзельніцы Беларусі”, — гаворыцца ў заяве літоўскага знешнепалітычнага ведамства.
Падкрэсліваецца, што “міжнародная ізаляцыя злачынных рэжымаў Расіі і Беларусі — паслядоўны і прынцыповы кірунак замежнай і ўнутранай палітыкі Літвы”.
“Позірк“ звярнуўся ў БДІПЧ АБСЕ з просьбай падрабязней пракаментаваць адмову ад назірання за выбарамі ў Літве. На момант публікацыі адказу атрымана не было.
Акрамя першага тура прэзідэнцкіх выбараў, 12 траўня ў Літве пройдзе рэферэндум аб унясенні паправак у Канстытуцыю. З Асноўнага закона прапануецца выключыць палажэнне, якое забараняе літоўскім грамадзянам атрымліваць другое грамадзянства.
