Камісія па выбарах у КР абмяркоўвае рэакцыю на выкарыстанне Азаравым бота плана “Перамога” для агітацыі
![](https://pozirk.online/wp-content/uploads/2024/02/ks_logo_fb_1128x752.jpg)
22 траўня, Позірк. Камісія па выбарах у Каардынацыйную раду (КР) абмяркоўвае сваю рэакцыю і магчымыя наступствы таго, што лідар балатаванага спісу “Закон і Правапарадак” Аляксандр Азараў выкарыстаў для агітацыі рэсурс плана “Перамога”, паведаміла “Позірку” кіраўніца выбаркама Алена Прыходзька.
Напярэдадні ўсе, хто актываваў чат-бот плана “Перамога”, атрымалі паведамленні з заклікам узяць удзел у выбарах у КР 25–27 траўня і галасаваць за згаданы спіс. Азараў у гутарцы з “Нашай Нівай” (НН) пацвердзіў, што чат-бот і рассылка сапраўдныя. У адным з публічных чатаў, выявіла медыя, палітык напісаў: “Мы рэгулярна праводзім рассылку, чаго так усе нашыя хэйтары перапалохаліся. Павылазілі з усіх шчылін і пырскаюць слінай”.
НН нагадала, што за ўзаемадзеянне з планам “Перамога” беларусам унутры краіны можа пагражаць адказнасць — ад адміністрацыйнай да крымінальнай.
Варта адзначыць, што кіраўнік арганізацыі былых сілавікоў ByPol Аляксандр Азараў на пачатку красавіка дзеля ўдзелу ў выбарах у КР пакінуў пасаду каардынатара плана “Перамога”.
21 траўня стала вядома, што Следчы камітэт узбудзіў крымінальныя справы супраць усіх удзельнікаў выбараў у КС. Фігурантамі з’яўляюцца 257 чалавек, іх абвінавачваюць паводле арт. 357 (змова з мэтай захопу дзяржаўнай улады), 361 (заклікі да мераў абмежавальнага характару), 3611 (стварэнне экстрэмісцкага фарміравання) і 3614(садзейнічанне экстрэмісцкай дзейнасці) Крымінальнага кодэкса.
Да гэтага КДБ абвясціў усе 12 спісаў, якія ўдзельнічаюць у выбарах, “экстрэмісцкімі фарміраваннямі”.