Лукашэнка падпісаў указ аб “найхутчэйшым завяршэнні” доўгабуда ў сталічнай Грушаўцы

22 траўня, Позірк. Указ аб “найхутчэйшым завяршэнні” будаўніцтва комплексу жылых дамоў у мінскім мікрараёне Грушаўка падпісаў 22 траўня Аляксандр Лукашэнка, паведамляе яго прэс-служба.

Адзначаецца, што дакумент “карэктуе” аналагічны ўказ, падпісаны Лукашэнкам 15 верасня 2021 года.

Новы ўказ прадугледжвае “шэраг змяненняў”, якія паскораць “завяршэнне будаўніцтва шматкватэрных жылых дамоў няздольнага забудоўшчыка ТАА “Жылбудкамплект” на скрыжаванні праспекта Дзяржынскага і вуліцы Шчорса ў Мінску”, гаворыцца ў паведамленні.

“У мэтах забеспячэння роўных магчымасцяў для ўсіх удзельнікаў будаўніцтва дольшчыкам, якія мелі з ТАА “Жылбудкамплект” дамовы на ўзвядзенне аб’ектаў долевага будаўніцтва, указам прадастаўляюцца такія ж правы, як і трымальнікам жыллёвых аблігацый”, — удакладняецца ў прэс-рэлізе.

16 кастрычніка 2023 года Следчы камітэт паведаміў аб пачатку спецыяльнай вытворчасці ў дачыненні да Іллі Волаха — заснавальніка ТАА “Жылбудкамплект”, які сем гадоў таму пачаў будаўніцтва жылога комплексу “Грушаўскі пасад” у Мінску.

Паводле даных ведамства, Волах “прычыніў вялікую маёмасную шкоду дольшчыкам пры будаўніцтве дамоў згаданага жылога комплексу”. Яго вінавацяць паводле ч. 2 арт. 240 (наўмысная эканамічная неплацежаздольнасць (банкруцтва) і ч. 3 арт. 424 (злоўжыванне ўладай або службовымі паўнамоцтвамі) Крымінальнага кодэкса.

Завяршае будаўніцтва жылога комплексу побач з метро “Грушаўка” УКБ “Захад”. У склад комплексу павінны былі ўвайсці чатыры каркасна-блочныя дамы вышынёй ад 18 да 23 паверхаў. Першыя два дамы былі здадзены яшчэ ў 2014–15 гадах, затым будоўля спынілася ў 2020-м.

Сітуацыя закранула каля 450 сем’яў дольшчыкаў. У жніўні 2020 года яны запісалі зварот да ўладаў Беларусі і Польшчы з просьбай праверыць правамернасць дзеянняў Волаха і пазбавіць яго віда на жыхарства ў Польшчы.

У лістападзе дзяржСМІ паведамлялі са спасылкай на СК, што расследаванне крымінальнай справы ў дачыненні да Волаха знаходзіцца на завяршальным этапе. Пацярпелымі былі прызнаны 423 чалавекі, таксама ўрон быў нанесены 7 суб’ектаў гаспадарання.

4 студзеня 2024 года СК паведаміў, што Варшава адмовіла Беларусі ў экстрадыцыі Волаха, які ўжо прыняў польскае грамадзянства.