Фрылансера Чарняўку і ўладальніцу крамы “Адметнасць” Верамеенку збіраюцца завочна судзіць (дапоўнена)

28 траўня, Позірк. У дачыненні да жонкі палітвязня Паўла Мажэйкі журналісткі-фрылансера Ірыны Чарняўкі і ўладальніцы крамы “Адметнасць” Вольгі Верамеенка распачатая спецыяльная вытворчасць, вынікае з адпаведнага пераліку на сайце Следчага камітэта.

Чарняўка абвінавачваецца паводле ч. 1 і 2 арт. 361⁴ КК (садзейнічанне экстрэмісцкай дзейнасці), Верамеенка — паводле ч. 2 гэтага ж артыкула.

Спецыяльная вытворчасць у дачыненні да Чарняўкі і Верамеенкі распачатая 23 траўня. Абедзвюм прапанавана з’явіцца ва ўпраўленне Следчага камітэта па Гродзенскай вобласці.

Кіраўнік ліквідаванай уладамі гродзенскай арганізацыі “Цэнтр гарадскога жыцця”, журналіст Павел Мажэйка ў 2023 годзе быў прыгавораны да 6 гадоў пазбаўлення волі паводле ч. 2 арт. 361⁴ КК.

Згодна з матэрыяламі справы, Мажэйка размясціў на сайце тэлеканала “Белсат” перададзеную яму юрыстам Юліяй Юргілевіч інфармацыю пра яе сыход з адвакатуры і пра вырак мастаку-палітвязню Алесю Пушкіну (быў асуджаны на 5 гадоў пазбаўлення волі, памёр у шпіталі 11 ліпеня 2023 года).

19 сакавіка 2024 года Міністэрства ўнутраных спраў прызнала “экстрэмісцкім фарміраваннем” краму тавараў з нацыянальнай сімволікай “Адметнасць”. Паведамлялася, што дачыненне да яго маюць Сяргей і Вольга Верамеенка — сямейная пара, якой належала аднайменная крама ў Гродне. Пасля вымушанага пераезду ў Беласток (Польшча) яны адкрылі інтэрнэт-краму з такой жа назвай.

У 2020 годзе Сяргей Верамеенка адбыў адміністрацыйны арышт за ўдзел у акцыях пратэсту, у краме адбыўся вобшук. 14 сакавіка 2024-га СК пачаў у дачыненні да яго спецвытворчасць паводле ч 1. і ч. 2 арт. 361⁴ КК.