Пасля “жорсткага ўзгаднення” Літва дазволіла беларускаму самалёту прызямліцца ў вільнюскім аэрапорце

29 траўня, Позірк. У аэрапорце Вільнюса раніцай 28 траўня прызямліўся лёгкі спартовы самалёт, які прыляцеў з Мінска. Інфармацыя пра гэта з’явілася на сайце Flightradar, які адсочвае міжнародныя авіямаршруты, паведамляе партал 15min.lt.

Рэгістрацыйны нумар самалёта — EW-535SL, адзначае выданне, “дакладнае месца ўзлёту не пазначанае, але, мяркуючы з інфармацыі з адкрытых крыніц, самалёт прыпісаны да прыватнага аэрадрома пад Мінскам”.

Прадстаўнік кампаніі “Літоўскія аэрапорты” Тадас Васіляўскас пацвердзіў, што борт “прыляцеў з Мінска”.

Паводле яго слоў, “праводзілася жорсткая працэдура ўзгаднення палёту і праверкі”, паветраным суднам “кіравала прыватная асоба”. Васіляўскас удакладніў, што такія працэдуры распаўсюджваюцца на ўсе нерэгулярныя рэйсы.

“Пасля працэдуры праверкі самалёту дазволілі здзейсніць пасадку ў вільнюскім аэрапорце”, — канстатаваў ён.

Мяркуючы па апублікаваным СМІ фота, самалёт прыпісаны да прыватнага аэрадрома Сівіца (Барысаўскі раён). Гаворка ідзе пра самалёт SportStar RTC, папулярнай мадэлі лёгкага двухмеснага спартыўнага самалёта чэшскай вытворчасці.

Хто менавіта кіраваў самалётам, невядома.