З 1 чэрвеня польская нацыянальная віза падаражэе да 135 еўра

30 траўня, Позірк. З 1 чэрвеня гэтага года кошт польскай нацыянальнай візы (тып D) павялічыцца да 135 еўра, паведамляе візавы цэнтр VFS Global са спасылкай на консульскі аддзел пасольства Польшчы ў Мінску.

Гаворка ідзе пра суму аплаты за прыём і разгляд заявы на атрыманне такой візы, а таксама за паўторны разгляд заявы.

Пры гэтым адзначаецца, што “памер [консульскага] збора для грамадзян Беларусі, якія афармляюць нацыянальную візу на тэрыторыі Рэспублікі Беларусь, застаецца на ранейшым узроўні (35 еўра), змяняецца толькі плата за паўторны разгляд заявы на нацыянальную візу — 135 еўра”.

Цяпер, згодна з інфармацыяй на сайце ўрада Польшчы, кошт “прыёму і разгляду заявы аб выдачы нацыянальнай візы” складае 80 еўра.

Таксама, паводле даных VFS Global, з 6 па 11 чэрвеня 2024 года візавыя цэнтры Польшчы ў Мінску, Гомелі і Магілёве не будуць прымаць заявы на атрыманне шэнгенскіх віз (тып С).

Удакладняецца, што плата за прыём і разгляд заявы на атрыманне шэнгенскай візы і за паўторны разгляд застанецца нязменнай.