Паскарэнне росту крэдытавання ў Беларусі вядзе да большага інфляцыйнага ціску — ЕАБР
3 чэрвеня, Позірк. У Беларусі паскорыўся рост крэдытавання, канстатуюць аналітыкі Еўразійскага банка развіцця (ЕАБР) у штотыднёвым макрааглядзе.
“Крэдытны партфель банкаў вырас на 2,5% м/м (месяц да месяца. — “Позірк”.) у красавіку 2024 года пасля 0,7% м/м сакавіку, — гаворыцца ў дакуменце. — Асабліва заўважна паскорыўся рост крэдытавання юрыдычных асоб: да 2,5% м/м у красавіку з 0,2% м/м у сакавіку. Крэдыты фізічных асоб выраслі на 2,4% м/м у красавіку пасля 1,9% м/м у сакавіку, у тым ліку па спажывецкіх крэдытах на 3,6% м/м пасля 2,9% м/м адпаведна”.
Аналітыкі банка папярэдзілі, што “паскарэнне росту крэдытавання фармуе ўмовы для далейшага росту ўнутранага попыту і павышэння праінфляцыйнага ціску”.
За тыдзень да гэтага ЕАБР адзначаў, што фактарам праінфляцыйнага ціску ў Беларусі таксама з’яўляецца паскарэнне росту рэальнага заробку.
BEROC чакае, што рост цэн па выніках года складзе 6,1%, Міжнародны валютны фонд прагназуе 6,3%, Еўразійскі банк развіцця прадбачыць 8%.
Згодна з важнейшымі прагнознымі (дэ-факта планавымі) параметрамі развіцця краіны на 2024 год, рэальныя наяўныя грашовыя даходы насельніцтва павінны вырасці на 3,5%, рэальныя заробкі — на 3,9%, намінальны сярэднямесячны заробак павінен узрасці да 2.087 рублёў (у бюджэтным сектары — да 1.634); інфляцыя не павінна перавысіць 6%.
