3 чэрвеня, Позірк. За мінулыя суткі ў Беларусі патанула сем чалавек, паведамляе Беларускае рэспубліканскае таварыства ратавання на водах (АСВОД).
Разам з тым, паводле звестак Следчага камітэта, за папярэднія тры дні (31 траўня — 2 чэрвеня) у краіне патанула 8 чалавек, у тым ліку ў Віцебскай вобласці — 6.
Паведамляецца, што большасць загінулых — мужчыны ва ўзросце 30–75 гадоў.
Сярод патанулых навучэнка медыцынскага каледжа, якая адпачывала з сябрамі на беразе Заходняй Дзвіны. Яна спрабавала выратаваць чалавека, які тануў, але загінула сама.
За травень у вадаёмах Беларусі патанула 34 чалавекі, вынікае з праведзенага “Позіркам” аналізу статыстыкі АСВОД. Паводле даных арганізацыі, у 2023 годзе ў Беларусі патанула 339 чалавек — на 12,2% менш, чым у 2022-м. Непаўналетніх загінула на вадзе 21 — годам раней 25 (-16%).
Паведамлялася, што 55,2% загінулых (187 чалавек, у тым ліку два падлеткі) знаходзілася ў стане алкагольнага або наркатычнага ап’янення.
МНС папярэджвае, што купанне дазволена толькі на адмыслова абсталяваных пляжах; вельмі небяспечна плаваць і ныраць у незнаёмых для адпачынку месцах. Не рэкамендуецца купацца пасля ўжывання спіртнога.
У ваду лепш заходзіць паступова, каб даць целу абвыкнуць да перападу тэмператур і пазбегнуць спазму крывяносных сасудаў.
Трэба растлумачыць дзецям, як трэба сябе паводзіць у вадаёме, адзначае МНС. За дзецьмі трэба пастаянна сачыць, калі яны знаходзяцца ў вадзе.
