Прызначаны новы пасол Казахстана ў Беларусі, папярэдні прабыў на пасадзе менш за год

4 чэрвеня, Позірк. Прэзідэнт Казахстана Касым-Жамарт Такаеў прызначыў Цімура Жаксылыкава паслом у Беларусі і пастаянным прадстаўніком пры СНД па сумяшчальніцтве.

Як адзначае прэс-служба Такаева, пры прызначэнні была падкрэслена “важнасць далейшага ўмацавання казахска-беларускага стратэгічнага партнёрства”. Прэзідэнт паставіў перад Жаксылыкавым “шэраг задач па развіцці шматпланавага супрацоўніцтва паміж Казахстанам і Рэспублікай Беларусь, а таксама па ўзаемадзеянні з статутнымі органамі СНД”, гаворыцца ў паведамленні.

Жаксылыкаў зменіць на чале дыппрадстаўніцтва Ерлана Байжанава, які працаваў паслом у Беларусі з 25 жніўня 2023 года.

9 сакавіка ў інтэрв’ю тэлеканалу “Беларусь 1” Байжанаў заявіў, што “ў межах паўгода” чакаецца візіт Такаева ў Беларусь.

Казахстан з’яўляецца адным з асноўных гандлёва-эканамічных партнёраў Беларусі. Краіны з’яўляюцца саюзнікамі па Арганізацыі Дагавора аб калектыўнай бяспецы і партнёрамі па Еўразійскім эканамічным саюзе.

Жаксылыкаў нарадзіўся ў 1968 годзе. Скончыў Маскоўскі дзяржаўны ўніверсітэт ім. Ламаносава, Казахскі фінансава-эканамічны інстытут і магістратуру Інстытута палітычных даследаванняў у Страсбургу. З лютага 2021 года займаў пасаду першага віцэ-міністра нацыянальнай эканомікі. Раней быў членам калегіі па эканоміцы і фінансавай палітыцы Еўразійскай эканамічнай камісіі.