Беларусь і Куба дамовіліся павялічыць тавараабарот за пяць гадоў да 30 млн долараў
12 чэрвеня, Позірк. Беларусь і Куба падпісалі пратакол да міжурадавага пагаднення аб узаемных пастаўках, заявіў намеснік міністра замежных спраў Яўген Шастакоў па выніках пасяджэння сумеснай камісіі па гандлёва-эканамічным супрацоўніцтве.
Пасяджэнне прайшло 12 чэрвеня ў Мінску, паведаміла прэс-служба МЗС.
Паводле слоў Шастакова, дакумент устанаўлівае “новую планку для аб’ёмаў тавараабмену — да 15 млн долараў для кожнага з бакоў цягам пяці гадоў”.
“Гэта вельмі амбіцыйная задача, асабліва калі прыняць да ўвагі, што за 10 гадоў працы ў рамках гэтага механізму абмен таварамі ажыццяўляўся на меншую суму”, — сказаў намеснік міністра.
На пасяджэнні бакі таксама абмеркавалі пастаўкі на Кубу беларускіх харчовых тавараў, “у першую чаргу, сухога малака”, сказаў намеснік кіраўніка знешнепалітычнага ведамства.
“Узгаднілі далейшыя крокі па сумесных інвестыцыйных праектах — стварэнне на Кубе прадпрыемства па зборцы трактарнай тэхнікі, сумеснай вытворчасці натуральнамалочнай прадукцыі з беларускай сыравіны на базе малочнага комплексу паблізу Гаваны, — дадаў Шастакоў. — <…>Разгледзелі пытанні супрацоўніцтва ў сферы аховы здароўя: ад рэгістрацыі прэпаратаў да выпуску сумеснай прадукцыі.
На думку дыпламата, “паспяховае ўзаемадзеянне ў гэтай галіне магло б паскорыць пранікненне беларускіх лекаў на рынкі Лацінскай Амерыкі і садзейнічаць замацаванню кубінскіх лекавых прэпаратаў на рынках краін ЕАЭС”.
Прэм’ер-міністр Беларусі Раман Галоўчанка на сустрэчы з віцэ-прэм’ерам Кубы Рыкарда Кабрысасам Руісам 11 чэрвеня заявіў, што летась абедзве дзяржавы “падвоілі аб’ём тавараабароту, захавалі станоўчую дынаміку і сёлета”, але пакуль “не ва ўсіх сферах дамагліся патрэбных вынікаў”.
Паводле слоў кіраўніка ўрада, “апошнім часам двухбаковы дыялог паміж Беларуссю і Кубай актывізаваўся на ўсіх узроўнях”. “Летась я двойчы сустракаўся з прэм’ер-міністрам Кубы, у тым ліку падчас яго афіцыйнага візіту ў Беларусь. Мы прадметна абмеркавалі ўсе сумесныя напрамкі супрацоўніцтва і намецілі дакладныя крокі па нарошчванні двухбаковага гандлёва-эканамічнага супрацоўніцтва ў першую чаргу”, — паведаміў ён.
На думку Галоўчанкі, першы напрамак супрацоўніцтва — “пашырэнне аб’ёмаў і механізмаў сустрэчнага гандлю”. Другое — “непасрэдна праекты, якія датычацца сумесных інвестыцый у выторчую сферу”.
11 чэрвеня, на фоне XI пасяджэння беларуска-кубінскай міжурадавай камісіі, на старонцы ўрада Кубы ў сацыяльнай сетцы Х з’явілася паведамленне аб тым, што Саўмін гэтай дзяржавы мае намер распрацаваць “праграму ўзаемадзеяння з органамі ўлады, фінансавымі інстытутамі і прадстаўнікамі бізнес-сектара”, накіраваную на “далейшае пашырэнне і дыверсіфікацыю двухбаковых сувязяў” з Беларуссю.
Мэта вышэйзгаданай праграмы, адзначае ўрад, заключаецца ў тым, каб “дамагчыся большай інтэграцыі і ўдзелу” Беларусі ў “нацыянальным плане эканамічнага і сацыяльнага развіцця Кубы да 2030 года”.
10 чэрвеня кіраўнік МЗС Кубы Бруна Радрыгес на сустрэчы з беларускім калегам Сяргеем Алейнікам у Ніжнім Ноўгарадзе (РФ) на палях пасяджэння кіраўнікоў МЗС краін БРІКС+ канстатаваў “высокі ўзровень узаемных адносін”, адзначыўшы “падтрымку Мінскам Гаваны ў асуджэнні эканамічнай, гандлёвай і фінансавай блакады, якая праводзіцца Злучанымі Штатамі супраць карыбскай краіны на працягу больш за шэсць дзесяцігоддзяў і ўзмацнілася ў апошнія гады”.
У апошні час Мінск і Гавана актывізавалі супрацоўніцтва ў ваеннай сферы. 8 красавіка ў беларускай сталіцы знаходзілася кубінская вайсковая дэлегацыя на чале з камандуючым СПА і ВПС генералам Марыё Эрнэста Радрыгесам Пеньярандай.
20 сакавіка Мінадукацыі Беларусі паведаміла пра перамовы начальніка Генеральнага штаба УС Віктара Гулевіча (адпраўлены ў адстаўку 10 траўня), якія прайшлі на Кубе з міністрам Рэвалюцыйных узброеных сіл Кубы Альвара Лопесам М’ерай і начальнікам Генштаба гэтай краіны Раберта Легра Саталонга.
У канцы студзеня міністр абароны Віктар Хрэнін падчас візіту ў гэтую краіну Карыбскага басейна правёў перамовы з кубінскім калегам, на якіх сярод іншага абмяркоўвалася ўзаемадзеянне і міжнародная абстаноўка. Па выніках сустрэчы яны падпісалі дакументы аб двухбаковым ваенным супрацоўніцтве.
15 красавіка Аляксандр Лукашэнка падоўжыў на два гады дзеючы механізм паставак лекаў з Кубы ў абмен на беларускія тавары.