Улады збіраюцца ліквідаваць аб’яднанне садзейнічання беларуска-расійскай інтэграцыі “Разам”

15 чэрвеня, Позірк. Мінскі гарадскі суд 19 чэрвеня разгледзіць іск Міністэрства юстыцыі з патрабаваннем ліквідаваць грамадскае аб’яднанне садзейнічання беларуска-расійскай інтэграцыі “Разам”, вынікае з раскладу на партале электроннага судаводства.

Суддзя Іна Угнівенка пачне працэс у 10:00.

Паводле звестак з Адзінага дзяржаўнага рэгістра юрыдычных асоб і індывідуальных прадпрымальнікаў (АДР), арганізацыя зарэгістраваная 1 сакавіка 1999 года.

У лютым 2022 года аб’яднанне “Разам” паведаміла Мінюсту пра намер працягнуць сваю працу. На пачатак таго года ў структуры было 125 членаў (у Брэсцкай вобласці — 25, іншых абласцях і Мінску — 95, у Расіі — 5).

У ліку мерапрыемстваў, праведзеных у 2021 годзе, фігуруе толькі два пасяджэнні праўлення. Пра тое, чым канкрэтна займаецца аб’яднанне, інфармацыі ў адкрытым доступе няма.

Намер уладаў ліквідаваць гэтую арганізацыю звяртае на сябе ўвагу ў кантэксце таго, што 8 снежня 2024 года будзе адзначацца 25-годдзе падпісання Дагавора аб стварэнні Саюзнай дзяржавы.

7 чэрвеня Мінгарсуд павінен быў разгледзець іск Мінюста аб ліквідацыі Беларускага грамадскага аб’яднання выкладчыкаў рускай мовы і літаратуры, які ўзначальвае загадчык кафедры рускай мовы філфака БДУ Іван Роўда (у 2002–2021 гадах быў дэканам факультэта). Рашэнне невядомае. У АДР арганізацыя пакуль значыцца як дзейная.