Затрыманы агент ФСБ Расіі, які шпіёніў на мяжы з Беларуссю — СБУ
24 чэрвеня, Позірк. Аб затрыманні завербаванага расійскай Федэральнай службай бяспекі (ФСБ) кіраўніка ўкраінскага пагранічнага атрада, які шпіёніў на ўкраінска-беларускай мяжы, паведаміла Служба бяспекі Украіны (СБУ) 24 чэрвеня ў сваім тэлеграм-канале.
Адзначаецца, што ён “усталёўваў лакацыі ўмацаваных раёнаў і арыентыровачную колькасць украінскіх войскаў, якія абараняюць межы з Беларуссю”, а таксама “спрабаваў перадаць каардынаты складоў з узбраеннем і боепрыпасамі Узброеных сіл Украіны на тэрыторыі рэгіёну”.
Паводле даных следства, фігурант “быў дыстанцыйна завербаваны” з тэрыторыі “часова акупаванага Луганска”.
Паведамляецца, што згаданы афіцэр, які праходзіў службу па кантракце, патрапіў у поле зроку Расіі, калі праходзіў службу на ўсходзе Украіны. Пасля яго перавялі ў адно з падраздзяленняў пагранічнага атрада ў Валынскай вобласці.
Падчас вобыску ў кватэры і на працоўным месцы затрыманага канфіскаваны “мабільны тэлефон і кампутар, якія ён выкарыстоўваў у злачыннай дзейнасці”.
Фігурант падазраецца ва ўчыненні злачынства, прадугледжанага ч. 2 арт. 111 Крымінальнага кодэкса Украіны (дзяржаўнае здрада, учыненае ва ўмовах ваеннага становішча), у сувязі з чым яму пагражае пажыццёвае зняволенне.
27 лютага стала вядома, што пракуратура Ровенскай вобласці Украіны накіравала ў суд абвінаваўчае заключэнне ў дачыненні да грамадзяніна Беларусі па фактах дыверсіі і ўдзелу ў тэрарыстычнай арганізацыі.
Паводле матэрыялаў справы, “абвінавачаны, будучы завербаваным агентам спецслужбаў РФ”, у студзені гэтага года “незаконна перасек мяжу Украіны, каб падрыхтаваць дыверсію па заданні свайго куратара”. Мужчына павінен быў усталяваць GPS-трэкеры на аб’ектах энергетычнай інфраструктуры, каб Узброеныя сілы РФ “атрымалі дакладныя каардынаты гэтых аб’ектаў для далейшага нанясення ўдараў”, што прывяло б да абясточвання сталіцы і часткі Кіеўскай вобласці.
Паводле інфармацыі пракуратуры, раней абвінавачаны быў удзельнікам узброеных фарміраванняў так званых “данецкай і луганскай народных рэспублік”, а ў 2023 годзе ўваходзіў у склад прыватнай ваеннай кампаніі “Вагнер” і ўдзельнічаў у баявых дзеяннях супраць Украіны ў раёне Бахмута ў Данецкай вобласці.
Аб затрыманні гэтага грамадзяніна Беларусі ў выніку “шматэтапнай спецаперацыі” Служба бяспекі Украіны паведаміла 15 студзеня.