Лукашэнка прапанаваў прарасійскаму прэм’ер-міністру Славакіі Фіца наведаць Беларусь

1 студзеня, Позірк. Аляксандр Лукашэнка “ад імя беларускага народа і сябе асабіста ” павіншаваў прэзідэнта Славакіі Петара Пелегрыні і прэм’ер-міністра краіны Роберта Фіца з нацыянальным святам — Днём стварэння Рэспублікі.

Персаналізаваныя віншаванні Лукашэнка накіраваў упершыню за апошнія некалькі гадоў: Пелегрыні (абраны ў красавіку 2024 года) і Фіца (прызначаны ў кастрычніку 2023 года) выступаюць за супрацоўніцтва з Расіяй, супраць вайсковай дапамогі Украіне. У 2022—2024 гадах віншаванні Лукашэнкі адрасаваліся “народу Славакіі“, у 2019—2021 гадах віншаванняў не было зусім, у 2018-м — было на імя тагачаснага прэзідэнта Андрэя Кіскі.

“Нягледзячы на стэрэатыпы і штучныя бар’еры ў еўрапейскім рэгіёне, для нашых краін і народаў адкрыты ўсе шляхі для добразычлівых і ўзаемавыгадных адносін“, — гаворыцца ў віншаванні на імя Пелегрыні.

Лукашэнка паведаміў адрасату, што мае намер развіваць “партнёрскія і дружалюбныя сувязі з Браціславай па шырокім спектры кірункаў“. “Таму прапаную па дыпламатычных каналах у бліжэйшы час узгадніць план першачарговых крокаў па аднаўленні нашага супрацоўніцтва з галоўным акцэнтам на праекты ў галіне гандлю, інвестыцый і прамысловай кааперацыі“, — гаворыцца ў пасланні.

У віншаванні на імя Фіца Лукашэнка падкрэсліў, што Беларусь арыентаваная на “плённае і ўзаемавыгаднае супрацоўніцтва з сяброўскай Славакіяй“. “Рух насустрач насуперак навязаным бар’ерам вельмі запатрабаваны ў рэгіёне. Мінск і Браціслава могуць і павінны пераканаць усіх, што непасрэдны дыялог заўсёды лепшы, чым канфрантацыя. Шлях няпросты, але, ацэньваючы вашы дзеянні і выказванні, я веру, што ўсякая справа нам пад сілу“, — звярнуўся Лукашэнка да Фіца.

“Улічваючы асабістую прыхільнасць Роберта Фіца захаванню гістарычнай памяці пра подзвіг продкаў”, Лукашэнка, які падтрымлівае расійскую агрэсію супраць Украіны, запрасіў таго “наведаць Мінск і Брэсцкую крэпасць напярэдадні 80-годдзя вялікай перамогі ў траўні 2025 года або ў іншы зручны для яго час“.

У адпаведнасці з пастановай Савета міністраў Беларусі ад 6 красавіка 2022 года Славакія як член Еўрапейскага саюза ўваходзіць у лік замежных дзяржаў, “якія здзяйсняюць недружалюбныя дзеянні ў дачыненні да беларускіх юрыдычных і (або) фізічных асоб“.