Удзел у Алімпіядзе пацвердзілі шэсць спартсменаў з Беларусі, пяць — адмовіліся

Ілюстратыўнае фота: сайт Міжнароднага алімпійскага камітэта

27 чэрвеня, Позірк. Шэсць індывідуальных нейтральных спартсменаў з Беларусі, дапушчаных да Алімпійскіх гульняў у Парыжы, па стане на 27 чэрвеня 2024 года пацвердзілі свой удзел у Алімпіядзе, вынікае з актуальнай інфармацыі на сайце Міжнароднага алімпійскага камітэта (МАК).

У прыватнасці, прынялі запрашэнне ўдзельнічаць Ганна Церах (шашэйныя велагонкі), Іван Літвіновіч і Віялета Бардзілоўская (скачкі на батуце), Сюзана Валадзько і Яўген Ціханцоў (цяжкая атлетыка) і Абукабар Хаслаханаў (барацьба).

Адмовіліся ад удзелу Ягор Акуліч, Уладзіслаў Казлоў, Дзмітрый Зарубскі, Віялета Рэбікава і Крысціна Сазыкіна (усе — барацьба).

Не далі на дадзены момант адказу весляры Яўген Залаты і Таццяна Клімовіч, стрэлкі Дар’я Чупрыс і Аляксандра Пятрова, тэнісісткі Арына Сабаленка і Вікторыя Азаранка.

Чакаецца рашэнне аб допуску на Гульні беларускіх прадстаўнікоў таэквандо (адна мужчынская ліцэнзія) і сучаснага пяцібор’я (дзве жаночыя ліцэнзіі).

15 чэрвеня Міжнародны алімпійскі камітэт МАК паведаміў аб допуску да Алімпіяды 11 беларускіх спартсменаў у нейтральным статусе.

Адзначалася, што ўсе яны ўхвалены нейтральнай групай па праверцы адпаведнасці спартоўцаў кваліфікацыйным патрабаванням (AINERP), якую МАК заснаваў у сакавіку гэтага года.

Нацыянальны алімпійскі камітэт Беларусі ў заяве 17 чэрвеня выказаў “неразуменне і абурэнне” наконт складу спартсменаў, дапушчаных да Алімпіяды.

“Паводле невытлумачальных прычын не дапушчаны да ўдзелу тыя атлеты, якія паспяхова прайшлі праверкі, удзельнічалі ў кваліфікацыйных спаборніцтвах і змаглі выйграць ліцэнзіі”, — гаварылася ў паведамленні.

“НАК Беларусі працягне перамовы з МАК і будзе змагацца індывідуальна за кожнага спартоўца — за яго права выступіць на Гульнях, — адзначалася ў заяве. — Канчатковае рашэнне наконт таго, хто паедзе на Алімпіяду, будзе прынята НАК сумесна з федэрацыямі па відах спорту, а таксама спартсменамі”.

Пры гэтым, удакладнілі ў арганізацыі, “адзін з асноўных аб’ектыўных прынцыпаў: павінны выступаць толькі тыя, хто змог заваяваць ліцэнзію на Гульні ў жорсткіх, абмежаваных і дыскрымінацыйных умовах, якія склаліся ў сусветным спорце на сённяшні дзень”.

У сваёй заяве НАК Беларусі выказваў незадаволенасць менавіта складам змагароў, у якім не аказалася наймацнейшых і тытулаваных атлетаў, якія раней заваявалі алімпійскія ліцэнзіі.

Сярод дапушчаных да Алімпіяды адсутнічалі Магамедхабіб Кадзімагамедаў, Аляксандр Гуштын, Павел Глінчук, Вераніка Іванова, Ванэса Каладзінская, Ірына Курачкіна, Арыян Цютрын, Дзяніс Храмянкоў.

Спартыўны партал by.tribuna.com 15 чэрвеня звярнуў увагу на прыналежнасць Глінчук і Івановай да спорткамітэта Мінабароны, Кадзімагамёдава і Каладзінскай — да апеканага МУС спартыўнага таварыства “Дынама”. Гуштын у 2019 годзе ўдзельнічаў у Сусветных ваенных гульнях.

Алімпійскія гульні пройдуць у Парыжы 26 ліпеня — 11 жніўня 2024 года.

28 лютага 2022 года, праз некалькі дзён пасля пачатку вайны ва Украіне, МАК заклікаў спартыўныя федэрацыі не дапускаць да спаборніцтваў пад сваёй эгідай атлетаў з РФ і Беларусі. Гэтая рэкамендацыя была неадкладна і масава прынята да выканання, у выніку чаго расійскі і беларускі спорт аказаўся амаль у поўнай ізаляцыі.

25 студзеня 2023 года выканкам МАК пацвердзіў санкцыі, уведзеныя ў дачыненні да Беларусі і РФ з-за вайны супраць Украіны, аднак зазначыў, што ніводнаму спартсмену нельга забараняць удзельнічаць у спаборніцтвах “толькі з-за яго пашпарта”.

28 сакавіка МАК выпусціў заяву, у якой рэкамендаваў міжнародным федэрацыям па відах спорту дазволіць беларусам і расіянам удзельнічаць у міжнародных спаборніцтвах. Пры гэтым павінен быць выкананы шэраг умоў. Беларускія і расійскія атлеты могуць спаборнічаць “у якасці індывідуальных нейтральных спартсменаў” (без выкарыстання сцяга, гімна і іншай сімволікі сваіх дзяржаў) і толькі ў тым выпадку, калі яны “актыўна не займаліся падтрымкай баявых дзеянняў” і не маюць дзейных кантрактаў з сілавымі і ваеннымі ведамствамі сваіх краін.

З аналагічнымі ўмовамі 8 снежня МАК дапусціў індывідуальных спартсменаў з Беларусі і Расіі да ўдзелу ў АІ-2024 у нейтральным статусе.