МЗС прыгразіў ЕС “асіметрычнымі захадамі” ў адказ на новыя санкцыі

1 ліпеня, Позірк. У адказ на новыя санкцыі Еўрасаюзу ўрадам Беларусі падрыхтаваны “комплекс асіметрычных захадаў”, заявіў 1 ліпеня прэс-сакратар Міністэрства замежных спраў Анатоль Глаз.

Паводле яго слоў, адказ Беларусі будзе звязаны “з узмацненнем жорсткасці ўмоў імпарту і дзейнасці ў Беларусі суб’ектаў з недружалюбных краін”.

“Яшчэ раз падкрэсліваем, што дадзеныя крокі з нашага боку не з’яўляюцца ініцыятыўнымі, і ўся віна за гэта ляжыць на ініцыятарах санкцый — кіраўніцтве ЕС“, — цытуе каментар Глаза дзяржСМІ прэс-служба знешнепалітычнага ведамства.

Паводле сцвярджэння прадстаўніка МЗС, пакеты еўрапейскіх санкцый аб’ядноўвае “поўная бесперспектыўнасць дасягнення іх дэструктыўных мэтаў”.

“Чым раней еўрабюракраты гэта зразумеюць, тым менш шкоды яны паспеюць нанесці еўрапейскаму ж бізнесу і насельніцтву. Для нас жа гэтыя новыя абмежавальныя меры — зусім прахадны этап”, — сказаў Глаз.

Свой пункт гледжання прадстаўнік МЗС аргументаваў тым, што ў Беларусі “шмат планаў развіцця, актыўна працуе эканоміка, краіна рыхтуецца да Дня незалежнасці, плануе стаць паўнапраўным членам ШАС”.

Санкцыі, паводле яго слоў, “яшчэ больш аслабяць сам Еўрасаюз”, а спробы кіраўніцтва ЕС “сваімі незаконнымі санкцыйнымі пакетамі” спыніць развіццё Беларусі “выглядаюць трохі камічна” і не падзяляюцца “глабальнай большасцю”.

У сувязі з гэтым “наўрад ці Еўрасаюзу ўдасца прэтэндаваць у будучыні на хоць колькі-небудзь важкую ролю ў новым светапарадку, які будуецца”, заявіў Глаз.

Ён у чарговы раз паўтарыў папулярны сярод спікераў МЗС наратыў аб тым, што “для зняцця ўзаемных прэтэнзій” дарэчны дыялог, да якога Беларусь “гатовая ў любых фарматах і па любых самых адчувальных пытаннях”.

29 чэрвеня Савет ЕС паведаміў пра новыя абмежавальныя захады эканамічнага характару ў дачыненні да Беларусі — у сувязі з удзелам рэжыму Аляксандра Лукашэнкі ў расійскай агрэсіі супраць Украіны. 30 чэрвеня прававыя акты, звязаныя з новымі санкцыямі ў дачыненні да Беларусі, былі апублікаваныя ў Афіцыйным часопісе ЕС.

Адзначана, што гэтыя меры дублююць санкцыі, якія ўжо ўведзеныя ў дачыненні да Расіі. Такім чынам, яны закліканыя вырашыць праблему абыходу абмежаванняў, абумоўленую “высокай ступенню інтэграцыі паміж расійскай і беларускай эканомікамі”.

Санкцыі датычацца сферы гандлю, паслуг, транспарту.