Ціханоўская: Супрацоўніцтва з дыктатарам сведчыць аб адсутнасці прыхільнасці дэмакратычным прынцыпам у ШАС

4 ліпеня, Позірк. З асуджэннем уступлення Беларусі ў склад Шанхайскай арганізацыі супрацоўніцтва (ШАС) выступіла дэмакратычны лідар Святлана Ціханоўская.

Сяброўства ў арганізацыі “выгаднае толькі рэжыму, а не народу Беларусі”, аўтарытэтныя лідары, на думку палітыка, “не павінны супрацоўнічаць з дыктатарам, які тэрарызуе сваіх грамадзян”, напісала яна ў сацсетцы Х (былы “Твітар”).

Паводле слоў Ціханоўскай, прыняцце афіцыйнага Мінска ў арганізацыю сведчыць аб “адсутнасці прыхільнасці дэмакратычным прынцыпам унутры ШАС”.

4 ліпеня ў Астане (Казахстан) падпісаныя дакументы аб прыняцці Беларусі ў ШАС.

Шанхайская арганізацыя супрацоўніцтва створаная ў 2001 годзе. Дэкларацыю аб яе заснаванні падпісалі кіраўнікі Казахстана, Кітая, Кыргызстана, Расіі, Таджыкістана і Узбекістана. Пазней да арганізацыі далучыліся Індыя, Іран, Пакістан.