Абазнаным у дзяржтаямніцах асобам за “незаконны выезд” з Беларусі пагражае крымінальны пераслед

11 ліпеня, Позірк. Адказнасць за “незаконны выезд” з краіны “дасведчанага аб дзяржаўнай таямніцы” грамадзяніна, права якога пакідаць Беларусь “заведама абмежаванае”, прадугледжана абноўленым арт. 375²Крымінальнага кодэкса (парушэнне патрабаванняў па абароне дзяржаўных сакрэтаў).

Пры адсутнасці прыкмет “здрады дзяржаве” і “наўмыснага разгалашэння дзяржтаямніцы” (арт. 356 і 373 адпаведна) дзеянні паводле абноўленага крымінальнага артыкула будуць карацца штрафам, арыштам, абмежаваннем або пазбаўленнем волі на тэрмін да 3 гадоў. Калі яны пацягнулі “цяжкія наступствы”, то абмежаваннем або пазбаўленнем волі на тэрмін да 5 гадоў.

Новая рэдакцыя арт. 375² КК утрымліваецца ў арт. 5 закона “Аб змене законаў па пытаннях прафілактыкі і безнагляднасці правапарушэнняў непаўналетніх”, апублікаванага 11 ліпеня на Нацыянальным прававым інтэрнэт-партале. Якое дачыненне пытанне дзяржтайны мае да сутнасці згаданага закона, не тлумачыцца.

Змены набудуць моц праз 10 дзён пасля афіцыйнага апублікавання.

Летась у лістападзе ўрад прыняў пастанову, якой вызначаны парадак узгаднення выезду за межы Беларусі чыноўнікаў і асобных дзяржслужачых. Іх абавязалі падаваць заявы за 10 дзён да меркаванай паездкі, пазначыўшы краіну або краіны, якія плануецца наведаць або праехаць транзітам, мэту паездкі, адрасы знаходжання, кантакты.

“Рашэнне аб узгадненні выезду, адмове ў такім узгадненні ў мэтах забеспячэння інтарэсаў нацыянальнай бяспекі афармляецца рэзалюцыяй”, — гаварылася ў пастанове.