Белгідрамет выпусціў штармавое папярэджанне пра залеву, што паралізавала Мінск, праз тры гадзіны пасля яе пачатку
Затопленая падземная аўтастаянка ў Мінску
18 ліпеня, Позірк. Белгідрамет выпусціў штармавое папярэджанне пра залеву, што паралізавала Мінск 18 ліпеня, праз тры гадзіны пасля яе пачатку, сведчыць праведзены “Позіркам” аналіз.
Папярэджанне з’явілася ў 13:12. Да гэтага часу прадпрыемства “Мінсктранс” апублікавала 30 з 31 экстранага паведамлення аб парушэнні руху грамадскага транспарту ў розных раёнах горада. 20 з іх з’явілася ў першую гадзіну непагадзі.
Напярэдадні сіноптыкі прагназавалі кароткачасовы дождж (такім лічыцца дождж працягласцю да трох гадзін) з верагоднасцю ападкаў 70—80% і дапускалі навальніцу. Штармавое папярэджанне тычылася толькі паўднёва-ўсходніх раёнаў краіны.
Цяперашняя залева можа стаць наймацнейшай за ўсю гісторыю інструментальных назіранняў за надвор’ем у сталіцы. Колькасць ападкаў, якая выпала днём, стане вядомая позна вечарам. Пакуль рэкорд 77,5 мм (77,5 л вады на квадратны метр тэрыторыі), ён зафіксаваны 8 жніўня 2005 года, калі даждлівы цыклон раскруціўся наўпрост над горадам.
Згодна з падлікамі “Позірку”, заснаванымі на паведамленнях “Мінсктранса”, парушалася праца 87 маршрутаў наземнага грамадскага транспарту: 51 аўтобуснага, 30 тралейбусных і 6 трамвайных, у тым ліку аўтобусаў прыгарадных зносін, уключаючы аэрапорт. На паўгадзіны закрывалася станцыя метрапалітэна “Парк Чалюскінцаў”.
Найбольш пацярпелыя — маршруты тралейбусаў № 34 “Ангарская-4 — Зялёны Луг-3” (7 паведамленняў аб парушэнні працы), № 33 “Дражня — Адоеўскага”, № 35 “Славінскага — Серабранка” і № 92 “Карастаянавай — Чыжоўка-6” (па 6).
Спыненне руху склала ад 15 хвілін да 4 гадзін 49 хвілін (на вуліцах Каліноўскага і Кнорына).
Паводле інфармацыі МНС, былі затопленыя 43 участкі дарог. У падземным паркінгу на вуліцы Коласа, 73, корпус 3 пад вадой апынулася 14 аўтамабіляў, ідзе адпампоўка вады, паведаміла ведамства. Вада пратачылася ў гандлёвыя цэнтры, у крытую частку Камароўскага рынка.
