Дэлегацыя ўзброеных сіл Зімбабвэ наведвае Беларусь

1 лістапада, Позірк. Дэлегацыя ўзброеных сіл Зімбабвэ наведвае Беларусь, яе ўзначаліў начальнік штаба сумесных аперацый і планавання віцэ-маршал авіяцыі краіны Джаспер Марангванда, паведамляе Міністэрства абароны.

Для дэлегацыі 1 лістапада было арганізавана “наведванне роты інфармацыйных тэхналогій і экскурсія па музеі ваеннай гісторыі” ў Ваеннай акадэміі.

“Наведванне праводзіцца ў працяг дыялогу па развіцці ваенных кантактаў з Рэспублікай Зімбабвэ, які адкрылі міністры абароны дзвюх краін — генерал-лейтэнант Віктар Хрэнін і спадарыня Оппах Мучынгуры-Кашыры ў маі 2023 года”, — паведамілі ў ваенным ведамстве.

Лукашэнка наведваў Зімбабвэ з 30 студзеня па 1 лютага 2023 года. У час візіту паміж Мінскам і Харарэ было падпісана каля 20 пагадненняў аб супрацоўніцтве.

27 сакавіка ў беларускай сталіцы адкрылася зімбабвійскае пасольства.

У красавіку са шматдзённым візітам у Мінск прыязджала жонка прэзідэнта гэтай краіны Аксілія Мнангагва.

Узаемадзеянне з Зімбабвэ курыруюць віцэ-прэм’ер Пётр Пархомчык і спецпасланнік Лукашэнка, яго даўні паплечнік Віктар Шэйман.

30 кастрычніка, паводле інфармацыі зімбабвійскага боку, Шэйман наведваў краіну. У тым ліку ён сустрэўся з Мнангагвай.

Паводле неафіцыйнай інфармацыі, Мінск задзейнічаны ў асваенні нетраў гэтай краіны.