У месцах пазбаўлення волі ў Польшчы знаходзіцца 146 беларусаў — гэта трэці паказчык сярод зняволеных замежнікаў

23 ліпеня, Позірк. У пенітэнцыярных установах Польшчы знаходзіцца 2.407 замежных грамадзян — на 90% больш, чым у канцы 2020 года (1.267), паведамляе партал Poland Insider са спасылкай на звесткі Міністэрства юстыцыі гэтай краіны.

Найбольшую групу сярод зняволеных замежнікаў складаюць украінцы — 1.261 чалавек. Далей ідуць грузіны (330) і беларусы (146 чалавек). Сярод іншых асуджаных замежнікаў згадваюцца грамадзяне Палесціны, Іарданіі, Марока і Фінляндыі.

Большасць з іх асуджана за злачынствы, звязаныя з парушэннем бяспекі дарожнага руху, грамадскага парадку і забойствамі.

25 студзеня выданне Rszeczpospolita паведаміла, што ў 2023 годзе злачынствы ў Польшчы здзейснілі 17.278 замежнікаў — на 2,4 тыс. больш, чым у папярэднім.

Часцей за ўсё ў 2023 годзе закон парушалі ўкраінцы (яны складаюць больш за палову замежнікаў, якім прад’яўлена абвінавачванне). Далей называліся грузіны (2.714) і беларусы (1.030), за імі — прыехаўшыя з Малдовы і Расіі.

З прыведзеных даных відаць, што доля беларусаў у абодвух статыстычных справаздачах складае каля 6% ад замежнікаў, якія пераступілі закон.

На канец чэрвеня 2024 года ў сістэме сацыяльнага страхавання Польшчы было зарэгістравана больш за 134 тыс. грамадзян Беларусі, за год іх колькасць павялічылася на 12 тыс. Сярод замежнікаў, якія пражываюць у Польшчы, што фігуруюць у гэтай сістэме, беларусы на другім месцы. Па колькасці яны саступаюць украінцам (771 тыс.), але апярэджваюць грузін (27 тыс.).

Паводле даных Упраўлення па справах замежнікаў Польшчы, на 31 снежня 2023 года ў краіне пражывала 118.562 грамадзяніна Беларусі, якія маюць сапраўдны дакумент, выдадзены ў Польшчы і які дае права на знаходжанне на тэрыторыі краіны. 30 чэрвеня 2023 года падобныя дакументы мела 91 тыс. грамадзян Беларусі, у жніўні 2020 года — 28 тыс.