Каля 280 пацярпелых ад урагану атрымалі ад сацслужбаў дапамогу на 62,5 тыс. рублёў

26 ліпеня, Позірк. Каля 280 грамадзян, якія пацярпелі ад стыхійных бедстваў, атрымалі ад сацыяльных службаў дапамогу на суму 62,5 тыс. рублёў, паведамляе Міністэрства працы і сацабароны.

Адзначаецца, што пацярпелыя маглі звярнуцца ў свой тэрытарыяльны цэнтр сацабслугоўвання па аднаразовую дапамогу. Яна прадугледжаная для тых, чый даход у ліпені на аднаго члена сям’і не перавышае 628,1 рубля за месяц.

Непрацуючыя пенсіянеры і інваліды, якія пацярпелі ад непагадзі, звярталіся па матэрыяльную дапамогу са сродкаў Фонду сацыяльнай абароны насельніцтва.

Непагадзь 13 і 14 ліпеня ў Беларусі прывяла да маштабных пашкоджанняў у сістэме электраперадачы, парушэнняў водазабеспячэння, разбурэнняў. Найбольш ад ураганнага ветру пацярпела Гомельская вобласць, дзе ўводзілі рэжым надзвычайнай сітуацыі.

У тыя дні праз непагадзь загінула сем чалавек.

Пасля стыхіі, якая бушавала на поўдні Беларусі, Міністэрства энергетыкі падрыхтавала галіновы план мерапрыемстваў па падвышэнні надзейнасці працы электрасеткавага комплексу, паведаміў 24 ліпеня кіраўнік ведамства Віктар Каранкевіч.