У міждзяржаўны вышук аб’яўлены журналісты праекта “Бюро”
26 ліпеня, Позірк. Журналісты беларускага расследвальніцкага праекта “Бюро” Аляксандр Ярашэвіч, Аляксей Карпека і Вольга Альхіменка абвешчаныя ў міждзяржаўны вышук, паведамляе “Медыязона. Беларусь”.
Іх імёны знаходзяцца ў базе крымінальнага вышуку расійскага МУС. Падставы не пазначаны, адзначана толькі, што яны “расшукваюцца па артыкуле КК”.
Каманда праекта ў сваё тэлеграм-канале падкрэсліла, што крымінальны пераслед расцэньвае як “рэакцыю на свае расследаванні і спробу ціску дзейнай улады на незалежную журналістыку”.
“Бюро” са снежня 2023 года займаецца расследаваннямі карупцыйных схем, махлярства, ухілення ад падаткаў, адмывання грошай, абыходу санкцый, парушэння правоў чалавека.
“Нашыя расследаванні не застаюцца незаўважанымі і ўплываюць на рэальнае жыццё: еўрапейскія палітыкі ўводзілі санкцыі, а чыноўнікі ініцыявалі праверкі і заводзілі крымінальныя справы. Па выніках нашых расследаванняў адмянялі вынікі дзяржаўных закупак, вярталі жыццёва важныя аперацыі ў звычайных бальніцах”, — піша пра сябе “Бюро”.
Першае расследаванне каманда выпусціла 11 снежня 2023 года, другое — 9 студзеня 2024 года. 31 студзеня суд Чыгуначнага раёна Гомеля прызнаў сайт і сацсеткі “Бюро” “экстрэмісцкімі матэрыяламі”.
Улады з 2020 года мэтанакіравана пераследуюць журналістаў незалежных СМІ, большасць сайтаў і сацсетак якіх унесены ў спісы “экстрэмісцкіх матэрыялаў”, многія прызнаныя “экстрэмісцкімі фармаваннямі”.
Паводле звестак Беларускай асацыяцыі журналістаў, у краіне 38 супрацоўнікаў СМІ знаходзяцца ў зняволенні.