Беларускія педагагічныя ВНУ могуць адкрыць філіялы ва Узбекістане

9 верасня, Позірк. Мінск і Ташкент разглядаюць магчымасць адкрыцця ва Узбекістане філіялаў беларускіх педагагічных ВНУ, паведаміла Міністэрства адукацыі.

Адзначаецца, што пытанне абмяркоўвалася на сустрэчы міністра адукацыі Андрэя Іванца з хакімам Сурхандар’інскай вобласці Узбекістана Улугбекам Касімавым і прыступіўшым 1,5 месяцы таму да выканання абавязкаў амбасадара ў Беларусі Нурыддзінам Мамажонавым.

На думку ведамства, адкрыццё філіялаў “будзе спрыяць павышэнню якасці падрыхтоўкі мясцовых педагагічных кадраў”.

У цэнтры ўвагі сустрэчы таксама былі пытанні “інтэграцыі адукацыі з рэальным сектарам эканомікі і падрыхтоўкі запатрабаваных кадраў для прамысловасці, аграпрамысловага комплексу і ІТ-сферы”.

Бакі дамовіліся паскорыць заключэнне дагавораў паміж ВНУ і каледжамі дзвюх краін. Акцэнт зроблены на практычнай падрыхтоўцы студэнтаў. “Для маштабавання вызначаны паспяховы вопыт Полацкага дзяржаўнага ўніверсітэта імя Еўфрасінні Полацкай і ААТ “Нафтан”, дзе навучэнцы асвойваюць прафесійныя навыкі на вытворчасці з першага курсу”, — гаворыцца ў паведамленні.

Таксама дасягнута дамоўленасць аб арганізацыі стажыровак узбекскіх навукоўцаў у Беларусі. Прыярытэтныя напрамкі сумесных даследаванняў: біятэхналогіі, размнажэнне і адаптацыя раслін, распрацоўка функцыянальных матэрыялаў, уключаючы сарбенты і гідрагелі, для рацыянальнага выкарыстання водных рэсурсаў і рэкультывацыі глебаў.

Па выніках сустрэчы пацверджаны ўдзел дэлегацыі Сурхандар’інскай вобласці ў форуме рэктараў ВНУ, які адбудзецца ў Мінску ўвесну 2027 года.

Аб “непарушнай дружбе і ўзаемным даверы паміж Мінскам і Ташкентам”, якія “будуць і надалей залогам паглыблення і пашырэння шматграннага беларуска-ўзбекскага супрацоўніцтва ў рэчышчы стратэгічнага партнёрства” заявіў Аляксандр Лукашэнка, віншуючы прэзідэнта Узбекістана Шаўката Мірзіёева і народ гэтай краіны з 35-й гадавінай незалежнасці 1 верасня.

Мірзіёеў наведваў Мінск 8–9 ліпеня і неўзабаве пасля гэтага звольніў амбасадара ў Беларусі Рахматулу Назарава “праз абыякавасць да пытанняў інвестыцый і замежнага гандлю”.

27 ліпеня прэс-служба беларускага МЗС паведаміла аб прыняцці міністрам Максімам Рыжанковым копій даверчых грамат новага амбасадара Нурыдзіна Мамажонава.