9 верасня, Позірк. Спыненне аўтобусных зносін паміж Літвой і Беларуссю паўплывала б на транспартныя кампаніі, але не прывяло б да сур’ёзных наступстваў для бізнесу, заявіў у эфіры радыё LRT прэзідэнт Літоўскай асацыяцыі пасажырскіх перавозчыкаў Гінтарас Накуціс.
Паводле яго слоў, цяпер паміж Літвой і Беларуссю выконваецца каля 30 аўтобусных рэйсаў у дзень, якімі карыстаюцца прыкладна 3 тыс. пасажыраў, пры гэтым “усе аўтобусы запоўненыя”.
Накуціс мяркуе, што магчымае спыненне рэйсаў не паставіць перавозчыкаў пад пагрозу банкруцтва.
“Калі такія рашэнні будуць прынятыя, бізнес дакладна не ўладкаваны так, што тут хтосьці збанкрутуецца. Мяжа ўжо зачынялася, праз гэта ніхто не збанкрутаваў. Нічога не адбылося б, але былі б пабочныя наступствы”, — удакладніў ён.
“Тут не той выпадак, калі бізнес займаецца толькі рэйсамі ў Беларусь, гэта сегмент, які дапаўняе агульную дзейнасць па перавозцы пасажыраў”, — дадаў кіраўнік асацыяцыі.
LRT адзначае, што такім чынам Накуціс адрэагаваў на заклік дэпутата-кансерватара літоўскага парламента Арвідаса Анушаўскаса далучыцца да планаў Латвіі цалкам забараніць аўтобусныя рэйсы ў Беларусь і Расію.
Анушаўскас заявіў, што такое рашэнне варта разглядаць перш за ўсё як пытанне бяспекі і ўстойлівасці рэгіёну, а не бізнесу.
“Калі мы не далучымся да агульнага рашэння разам з Латвіяй, то станем такім транзітным дваром — проста ўсе маршруты з Латвіі перамесцяцца ў Літву”, — сказаў дэпутат.
Паводле яго слоў, у афіцыйным спісе Літоўскай адміністрацыі транспартнай бяспекі цяпер налічваецца 29 дзеючых дазволаў на рэгулярныя пасажырскія перавозкі паміж Літвой і Расіяй і Беларуссю альбо транзітам праз Літву. 17 з іх — маршруты з Вільнюса ў Мінск, Гродна, Гомель, Ліду і Ашмяны.
Як паведамляў “Позірк”, раней Міністэрства зносін Латвіі прадставіла ўраду праекты паправак, якія прадугледжваюць з 2027 года поўную забарону рэгулярных і нерэгулярных аўтобусных перавозак у Беларусь і Расію. У цяперашні час забароненыя толькі нерэгулярныя перавозкі.
