АПК: Польшча не плануе абмяжоўваць уезд асабістых аўтамабіляў з беларускай рэгістрацыяй
26 ліпеня, Позірк. Польшча не плануе абмяжоўваць уезд асабістых аўтамабіляў з беларускай рэгістрацыяй, паведаміла прэс-служба Аб’яднанага пераходнага кабінета (АПК) 26 ліпеня па выніках тэлефоннай размовы намесніка кіраўніка кабінета Паўла Латушкі з міністрам замежных спраў Польшчы Радаславам Сікорскім.
Удакладняецца, што размова адбылася з ініцыятывы кіраўніка польскага знешнепалітычнага ведамства.
Паводле сцвярджэння прэс-службы АПК, Сікорскі падкрэсліў, што Польшча “аддзяляе беларускі народ ад рэжыму дыктатара і прымае меры, каб змякчыць умовы для легалізацыі беларусаў”, будзе “прытрымлівацца пазіцыі” не абмяжоўваць перасячэнне грамадзянамі Беларусі беларуска-польскай мяжы, а таксама не плануе уводзіць забарону на выкарыстанне асабістых аўтамабіляў з беларускай рэгістрацыяй і здзяйсняць іх канфіскацыю, “як гэта ажыццяўляецца ў дачыненні да аўтамабіляў з расійскай рэгістрацыяй”.
Таксама ён паўтарыў патрабаванні да рэжыму Аляксандра Лукашэнкі: “Спыніць міграцыйную вайну, выдаць злачынцу, які здзейсніў забойства польскага салдата, а таксама дамагаецца вызвалення палітвязняў у Беларусі, у тым ліку актывіста польскай меншасці Анджэя Пачобута”.
Латушка “падзякаваў міністру за прынцыповую пазіцыю і адзначыў, што для беларусаў важная лідзіруючая роля Польшчы ў Еўрасаюзе як краіны, якая найбольш глыбока разумее важнасць падтрымкі дэмакратычнага руху і дэмакратычных пераўтварэнняў у Беларусі, а таксама важнасць адкрытасці Еўропы для беларусаў”.
Польскі бок аб сустрэчы не паведамляе.
З 18 ліпеня Літва перастала ўпускаць легкавыя аўтамабілі з беларускімі нумарамі. Да 16 жніўня дазволены ўвоз легкавых аўтамабіляў, якія належаць грамадзянам Беларусі з дзеючай візай, відам на жыхарства пры ўмове, што транспарт прызначаны для асабістага карыстання, але не для продажу. Гэтая агаворка не распаўсюджваецца на аўтамабілі, якія належаць юрыдычным асобам або выкарыстоўваюцца ў камерцыйных мэтах.
Пасля 18 студзеня 2025 года знаходжанне аўтамабіляў з беларускімі нумарамі на тэрыторыі краіны будзе лічыцца парушэннем закону і карацца штрафам ці канфіскацыяй транспарта.
Пры гэтым забарона не распаўсюджваецца на дыпламатычныя аўтамабілі, калі транспартны сродак выкарыстоўваецца дыппрадстаўніцтвамі і міжнароднымі арганізацыямі, якія карыстаюцца імунітэтам у адпаведнасці з міжнародным правам.
З 16 ліпеня асобам на легкавых аўтамабілях з беларускімі нумарамі забараняецца ўязджаць у Еўразвяз праз пункты пропуску на мяжы Латвіі з Беларуссю і Расіяй. Гэтая раней дзейнічала ў дачыненні да зарэгістраванага ў РФ транспарту.
17 ліпеня аб намеры забараніць ўезд аўтамабіляў з беларускімі нумарамі заявілі ў Эстоніі.
Абмежаванні тлумачаць прынятымі 29 чэрвеня новымі санкцыямі ЕС супраць Мінска.
З 9 ліпеня ў Польшчу не ўпускаюць беларускія аўтамабілі, калі ў салоне адсутнічае іх уладальнік.