Праз непагадзь у Карэліцкім раёне атрымаў траўму ляснік — МНС

29 ліпеня, Позірк. Праз непагадзь 28 ліпеня каля аграгарадка Ярэмічы ў Карэліцкім раёне (Гродзенская вобласць) атрымаў траўму ляснік, паведамляе прэс-служба Міністэрства па надзвычайных сітуацыях.

Паводле інфармацыі ведамства, на мужчыну ўпала галіна дрэва, ён шпіталізаваны.

Акрамя таго, у Ярэмічах абрынулася 14-метровая металічная воданапорная вежа, з-за чаго пазбавіліся вады 10 шматкватэрных і 61 прыватны дом. Водазабеспячэнне было аператыўна адноўленае.

У Гродзенскай вобласці шквалісты вецер пашкодзіў два жылыя дамы.

Выпадкі падзення дрэў зафіксаваныя ў сталіцы і ўсіх абласцях, акрамя Магілёўскай. Раней МНС паведамляла пра падзенне 91 дрэва.

Ратавальнікі распілоўваюць і прыбіраюць паваленыя дрэвы, расчышчаюць дарогі. Паведамляецца, што падраздзяленні атрымалі тэхніку падвышанай праходнасці, “забяспечана гатоўнасць да аператыўнага выкарыстання аварыйна-аднаўленчых брыгад арганізацый і прадпрыемстваў, рэзерваў матэрыяльных рэсурсаў для ліквідацыі НС, перасоўных электрагенерыруючых агрэгатаў, мабільных крыніц цеплазабеспячэння”.

Паводле інфармацыі МНС, 29 ліпеня ў Беларусі таксама чакаюцца дажджы і моцны вецер парывамі да 27 метраў на секунду.

Шкала Бофарта класіфікуе вецер хуткасцю 14–17 м/с як моцны (7 балаў з 12), 18–20 м/с — вельмі моцны (8 балаў), 21–24 м/с — шторм (9 балаў), 25–28 м/с — моцны шторм (10 балаў).