Былы прадстаўнік АПК Кавалеўскі абвясціў пра стварэнне Агенцтва еўраатлантычнага супрацоўніцтва

1 жніўня, Позірк. Дасягненне інтэграцыі незалежнай, суверэннай, дэмакратычнай Беларусі ў склад еўраатлантычнай супольнасці будзе асноўнай мэтай новастворанага Агенцтва еўраатлантычнага супрацоўніцтва (АЕС). Пра гэта паведаміў кіраўнік АЕС, былы прадстаўнік Аб’яднанага пераходнага кабінета (АПК) па міжнародных справах Валер Кавалеўскі.

На старонцы АЕС у сацыяльнай сетцы “Фэйсбук” адзначаецца, што арганізацыя разам з беларускімі і замежнымі ўдзельнікамі будзе спрыяць рэалізацыі стратэгічнай мэты беларускіх дэмакратычных сіл аб далучэнні да Еўрапейскага саюза як супольнасці з агульнымі каштоўнасцямі.

На думку заснавальнікаў АЕС, гэта “дазволіць Беларусі захаваць незалежнасць, абараніць нацыянальную ідэнтычнасць і дасягнуць эканамічнага росквіту”. “Гэта таксама ліквідуе прабел у рэгіянальнай бяспецы, якая знаходзіцца пад пагрозай з боку кантраляванай Крамлём дыктатуры Лукашэнкі”, — мяркуе арганізацыя.

Базавацца агенцтва будзе ў Варшаве. Кавалеўскі з’яўляецца яго выканаўчым дырэктарам. Эксперт па стратэгічных камунікацыях, культуролаг, спецыяліст па Злучаных Штатах Амерыкі і былы супрацоўнік аддзела публічнай дыпламатыі амбасады ЗША ў Беларусі Антон Пянькоўскі займае пасаду дарадцы па знешняй палітыцы. Былы прэс-сакратар Кавалеўскага ў АПК Кірыл Данько ўваходзіць у склад праўлення АЕС як дырэктар па камунікацыях.

Аб зняцці з сябе паўнамоцтваў у якасці прадстаўніка АПК па міжнародных справах Кавалеўскі абвясціў 26 чэрвеня.

1 жніўня стала вядома, што АПК пакінуў таксама прадстаўнік Кабінета па абароне і нацыянальнай бяспецы Валер Сахашчык.