Польшча і краіны Балтыі прапанавалі ўключыць Беларусь у пакет антырасійскіх санкцый ЕС да другой гадавіны ўварвання ва Украіну

23 студзеня, Позірк. Польшча і краіны Балтыі прапанавалі ўключыць Беларусь у 13-ы пакет антырасійскіх санкцый Еўрасаюза, зацвярджэнне якога плануецца 24 лютага, у другую гадавіну ўварвання РФ ва Украіну. Пра гэта 23 студзеня паведаміў партал rmf24.pl.

Адзначаецца, што ўключэнне Беларусі ў санкцыйны пакет ініцыяванае з мэтай перашкодзіць Маскве абыходзіць абмежаванні з дапамогай Мінска.

Прапанова Польшчы, Літвы, Латвіі і Эстоніі, паводле інфармацыі выдання, акрамя ўвядзення эмбарга на імпарт з Расіі звадкаванага прыроднага газу і алюмінію, утрымлівае забарону на навуковае супрацоўніцтва, узмацненне жорсткасці санкцый у авіяцыйнай сферы і пашырэнне спісу забароненай прадукцыі, якая выкарыстоўваецца пры вытворчасці дронаў.

8 студзеня намеснік кіраўніка Аб’яднанага пераходнага кабінета (АПК), кіраўнік Народнага антыкрызіснага ўпраўлення (НАУ) Павел Латушка заявіў, што гарманізацыі санкцый у дачыненні да Расіі і рэжыму Лукашэнкі не адбываецца, бо адпаведнае рашэнне блакуецца некаторымі чальцамі ЕС.

У прыватнасці, адзначыў ён, Партугалія блакавала прыняцце новага пакета санкцый у дачыненні да рэжыму Лукашэнкі, ставячы пытанне аб зняцці санкцый з беларускага калію.

18 снежня 2023 года ЕС прыняў 12-ы пакет санкцый у дачыненні да Расіі, у які былі ўключаныя 12 грамадзян Беларусі.

Апошні на сёння (сёмы) антыбеларускі пакет еўрапейскіх санкцый быў уведзены ў жніўні 2023 года.